Kryeministri Rama ka kritikuar Agjencinë për Trajtimin e Pronave lidhur me shërbimin ndaj qytetarëve, ndërsa tha se pret dorëheqje masive nga Kadastra.
Gjatë një takimi për prezantimin e reformës në Kadastër, kreu i qeverisë u bëri thirrje deputetëve, ministrave e punonjësve të administratës të mos bëjnë ndërhyrje për askënd pasi nuk do funksionojë.
“Krim të madh kanë bërë AMTP-të, për toka bujqësore, për shkëmbinj e shkrepa e ujin e detit. Nuk është se nuk kanë ndodhur edhe më pas. Kanë parë detin të kufizuar si pronë e patundshme. Që mos të them se letrat që janë rrugëve, në formën e kërkesave dhe njohjeve, stërnjohjeve, janë dyfishi i sipërfaqes së Shqipërisë, e pretendimet për pronë janë 421 mijë metra katrorë. Ndaj mbi një pronë gjen 3 palë pronarë. E gjithë kjo është si kapje dorë përdore të xhelatit me viktimën. Historia që një njeri kërkon titullin e pronësisë, që duhet të kërkojë xhelatin dhe të dy dorë për dore ecin, dhe xhelati thotë duhet dhe kjo…po ti e ke parasysh se m’i kërkon ai i gjati më lart, është dhe ky dhe pronari i rrugës kthehet në viktimë, mbaron. Ju ftoj të gjithëve ta provoni dhe do ta ndjej dhimbjen tuaj ku të arrini të gjeni se ku mund të kapet një pronë. Sot jam i çliruar. Është revolucion i jashtëzakonshëm. Pres dorëheqje masive nga Kadastra. Drejtorja e ka shumë të qartë; punonjësit e kësaj banke duhet të jenë bankierë dhe jo banakier. Mos bëni më asnjë ndërhyrje për askënd. “Ky na ka sjellë aq vota, se ai na ka dhënë triumfin, etje”, këto nuk funksionojnë.” – tha Rama.
Më tej kreu i qeverisë tha se do ketë rritje të konsiderueshme pagash për punonjësit e Kadastrës ndërsa u bëri thirrje të gjithë profesionsitëve që të aplikojnë për të qenë pjesë e kësaj agjencie.
Teksa solli si shembull Kadastrën e Vlorës ku janë ndërruar 9 drejtorë, ai tha se dizhitalizimi i shërbimeve do ndalojë korrupsionin.
“E dyta janë; pagat. Rritja e pagave të Kadastrës do të jetë e konsiderueshme. Dua t’i bëj apel atyre që janë profesionistë në ato profesione që kërkon Kadastra, që të aplikojnë, pasi realisht janë të domosdoshëm. Brenda Kadastrës ka njerëz që ia dinë punën. Shpresoj që një pjesë e tyre të mbetet. Kush do të ikë do të jetë më i falënderuar që po shpëtojmë prej tij. 9 drejtorë Kadastre janë ndërruar në Vlorë deri ditën kur i numërova, pastaj hoqa dorë nga numri dhe si deputetë i këtij qarku duke u konsultuar me të gjithë. Njëri më problem se tjetri. Lajmi im për të gjithë ata që i rrinë rrotull Kadastrës së Vlorës si ujqerit, ikni se nuk ka më Kadastër për ju. Askush aty brenda nuk ju ndihmon më. Jemi të gjithë këtu përgjegjës kryesorë për këtë situatë. Në këtë rast ka qenë rasti më evident ku kam kuptuar se nuk ka pushtet njeriu që bën punën dixhitalizimin. S’ka më punë as krushku as partia. Besoj se kjo është një ditë shumë e mirë.” – tha Rama.
