Policia franceze arrestoi 1.311 persona në gjithë vendin ndërsa demonstratat e dhunshme për vrasjen e një adoleshenti vazhduan për natën e katërt, tha sot Ministria e Brendshme e vendit.
Rreth 45 mijë oficerë policie të mbështetur nga automjete të blinduara u vendosën për të shuar protestat, në të cilat protestuesit i vunë zjarrin kontejnerëve dhe makinave dhe dëmtuan ndërtesat.
Sipas ministrisë, 79 zyrtarë të sigurisë, përfshirë policë dhe xhandarë, u plagosën gjatë natës.
Nahel M., një i ri 17-vjeçar me origjinë afrikano-veriore, u qëllua nga një oficer policie të martën në periferi të Parisit.
Oficeri përballet me një hetim zyrtar për vrasje me dashje dhe është vendosur në paraburgim.
OKB-ja ka shprehur gjithashtu shqetësime për rastin, duke i kërkuar Francës që të adresojë “çështjet e thella të racizmit dhe diskriminimit” në agjencitë e saj të zbatimit të ligjit.
