Axhenda klimatike e administratës Biden po përballet me një sfidë të papritur në Corpus Christi, Teksas, një vend i prirur ndaj thatësirës, ku një qendër e propozuar e hidrogjenit të pastër do kërkonte instalimin e impianteve të shkripëzimit të ujit të detit me energji intensive, të shtrenjta dhe potencialisht të dëmshme për mjedisin.
Porti i bregut të gjirit është në garë për deri në 1 miliard dollarë në dispozicion sipas Aktit të Investimeve në Infrastrukturë të vitit 2021 të presidentit Joe Biden për të krijuar një qendër rajonale për të prodhuar hidrogjen, një lëndë djegëse me emetime të ulëta të prodhuara nga elektrolizimi i ujit që mund të ndihmojë në dekarbonizimin e industrive me emetim të rëndë.
Një qendër hidrogjeni do kërkonte qasje në miliona litra ujë – një sfidë duke qenë se Corpus Christi po përjeton një thatësirë shumëvjeçare. Ndërsa zyrtarët lokalë thonë se mund ta sigurojnë atë ujë duke ndërtuar një impiant shkripëzimi të ujit të detit, grupet mjedisore dhe disa banorë dhe ligjvënës vendas janë rreshtuar për të kundërshtuar vendet e shkripëzimit.
“Nuk ka kuptim të krijohet një burim i supozuar i pastër i energjisë që nga ana tjetër shkatërron një ekosistem të tërë, kërcënon ekonomitë e tjera të varura nga një sistem i shëndetshëm dhe uzurpon furnizimin me ujë për banorët,” tha Aleanca Bregdetare për Mbrojtjen e Mjedisit, një grup activist në Corpus Christi në një letër drejtuar Sekretares së Energjisë së SHBA-së, Jennifer Granholm.
Reuters intervistoi gjashtë studiues që studiojnë hidrogjenin si fuqi e gjelbër dhe kishin qasje ekskluzive në një analizë nga konsulenca Rstad Energy që tregoi se vizioni i administratës Biden për hidrogjenin me karbon të ulët mund të përballet me një sfidë që përkeqësohet vetë nga ndryshimet klimatike: mungesa e ujit.
Prodhimi i hidrogjenit kërkon sasi të mëdha uji të freskët në një botë të prekur gjithnjë e më shumë nga thatësira e klimës.
9 nga 33 projektet në listën e ngushtë të Departamentit të Energjisë për qendrat e hidrogjenit janë në rajone që kanë shumë probleme me ujin, sipas të dhënave të Rystad.
Këto vende përfshijnë Kaliforninë Jugore, Koloradon, Kansasin dhe Neë Mexicon, si dhe Teksasin. Globalisht, tabloja është edhe më e keqe, me më shumë se 70% të projekteve të propozuara të hidrogjenit të gjelbër të vendosura në rajone me probleme të mungesës së ujit si Lindja e Mesme.
“Shumica e projekteve të planifikuara të hidrogjenit të gjelbër në botë do vendosen në rajone me probleme të ujit,” tha Minh Khoi Le, analist i energjisë së rinovueshme në Rstad, duke shtuar se kjo do krijonte kërkesë për më shumë impiante shkripëzimi.
Administrata Biden po u ofron kompanive deri në 100 miliardë dollarë kredi tatimore dhe rajoneve deri në 7 miliardë dollarë grante për të ndërtuar qendra hidrogjeni për të ndihmuar në arritjen e objektivit të prodhimit të 50 milionë ton metrikë karburant të pastër hidrogjen deri në vitin 2050.
Departamenti i Energjisë do shpallë qendrat në shtator.
Ai nuk pranoi të komentojë mbi Corpus Christi ose aplikacionet e tjera të qendrës së hidrogjenit, por Reuters vuri në dukje njoftimin e financimit të agjencisë, që ‘pranon se konsumi i ujit për këto qendra mund të vendosë presion shtesë në burimet ujore rajonale’.
Ndihmës Administratorja e Agjencisë Amerikane për Mbrojtjen e Mjedisit për Ujërat, Radhika Fox i tha Reuters se ‘më shumë sisteme ujore po shqyrtojnë shkripëzimin pasi uji i burimit bëhet më i rrallë dhe teknologjia e trajtimit përmirësohet’, por nuk komentoi drejtpërdrejt për Corpus Christi.
Peter Zanoni, menaxheri i qytetit për Corpus Christi, tha se projekti i hidrogjenit, nëse miratohet, kërkon miratimin e shkripëzimit të ujit të detit.
Edhe me rreth 100 milionë gallon furnizim me ujë nëntokësor në ditë, qyteti po përjeton kushte thatësire dhe po kufizon përdorimin e spërkatësve dhe ujitjes në një herë në javë, sipas planit të tij të emergjencës së thatësirës.
Qyteti është kontraktuar për të furnizuar deri në 25 milionë gallona ujë në ditë për përdoruesit kryesorë industrialë ExxonMobil dhe Basic Industries Corporation të Arabisë Saudite, tha Zanoni, dhe parashikon të presë të paktën gjysmë duzine prodhues të gjelbër të hidrogjenit në qendër, secilit prej të cilëve do t’u duhen rreth 3 deri në 4 milionë litra ujë të freskët në ditë.
Ai tha se qyteti planifikon të shtojë të paktën 70 milionë litra ujë në ditë të kapacitetit, duke përfshirë të paktën 30 milionë nga impianti i propozuar i shkripëzimit të ujit të detit.
“Ai burim i mbrojtur nga thatësira është vërtet tërheqës për ne,” tha Zanoni.
Luftërat e ujit
Ndërsa Shtetet e Bashkuara kanë qindra impiante shkripëzimi të shpërndara në të gjithë vendin për të trajtuar burimet e brendshme të ujit pak të njelmëta, shndërrimi i ujit tejet të kripur të oqeanit në ujë të ëmbël mbart një rrezik më të lartë, thonë disa ekspertë të ujit.
Pompimi i nënproduktit të kripur të shkripëzimit në gjirin e Corpus Christi mund t’i kushtojë industrisë së peshkimit rreth 6 milionë dollarë në vit duke vrarë speciet e ushqimeve të detit si karkaleca deti dhe kërpudhat e Atlantikut, sipas Paul Montagna nga Universitetit i Teksasit ‘A&M-Corpus Christi’.
Për më tepër impiantet e shkripëzimit të ujit të detit janë energji intensive dhe të shtrenjta për t’u ndërtuar dhe mirëmbajtur, thonë ekspertët e energjisë. Fabrika Poseidon pranë San Diego, Kaliforni, impianti më i madh i shkripëzimit të ujit të detit në hemisferën perëndimore, kushtoi mbi 1 miliard dollarë për t’u ndërtuar dhe kërkon gati 275 milionë dollarë përmirësime për të përmbushur rregullat e përditësuara të shtetit për të mbrojtur jetën detare që mund të thithet në tubat e marrjes ose ndikohen nga shkarkimi i kripur.
Në mars, EPA ndërhyri me një hua prej 170 milionë dollarësh për të kompensuar rritjen e çmimeve për konsumatorët vendas.
Corpus Christi propozoi për herë të parë shkripëzimin e ujit të detit në vitin 2017 për të furnizuar industrinë e saj me rritje të shpejtë të energjisë dhe petrokimikeve.
Qyteti ka luftuar për të siguruar lejet federale mjedisore dhe mbështetjen lokale. EPA në janar tha se nuk do njohë një leje të lëshuar nga shteti për shkarkimin e ndotësve për një nga impiantet e propozuara të shkripëzimit në Harbour Island derisa rregullatorët e Teksasit të kryejnë një rishikim më të plotë të ndikimit mjedisor të përdorimit të ujërave nëntokësore dhe përpjekjeve të ruajtjes.
Në një letër drejtuar Komisionit të Teksasit për Cilësinë e Mjedisit në shtator, EPA tha se ‘vazhdon të ketë shqetësime në lidhje me kërkesat e raportimit dhe mbikëqyrjes për lëndët e ngurta, klorureve dhe sulfateve të tretura totale’.
Në tetor, një shoqatë e banorëve lokalë nga lagjja Hillcrest, një zonë me shumicëne banorëve njerëz me ngjyrë të zezë që tashmë është shtëpia e rafinerive, paraqiti një ankesë të Ligjit për të Drejtat Civile duke thënë se impianti i propozuar i shkripëzimit ‘Inner Harbor’ do përkeqësonte ndotjen.
Qyteti po kërkon miratimin rregullator për tre vende të tjera shkripëzimi.
Errol Summerlin, themeluesi i grupit mjedisor lokal CAPE, tha se kostot mjedisore të shkripëzimit të ujit të detit ishin shumë të larta, edhe nëse është në mbështetje të një karburanti me karbon të ulët.
“Ky plan do shkatërronte një ekosistem për të krijuar një zgjidhje të paprovuar për krizën klimatike në botë,” i tha ai Reuters.
Brandon Marks, një aktivist rajonal për fushatën e Teksasit për mjedisin, tha se përdoruesit e industrisë së rëndë, jo banorët, kanë më shumë për të përfituar nga impiantet e propozuara të shkripëzimit.
Një raport i lëshuar në nëntor nga konsulenca Autocase Economic Advisory tha se gjatë dekadës së fundit, gati 70% e rritjes së përdorimit të ujit në zonën e Corpus Christi erdhi nga përdoruesit industrialë në krahasim me pak më pak se 6% nga familjet, përdorimet komerciale, mbrojtja nga zjarri, rekreacion publik dhe kanalizime.
“E gjithë arsyeja pse ata po përdorin këtë ujë është për të mundësuar rritje të papenguar, e cila jo vetëm që do dëmtonte gjirin, por do dëmtonte komunitetet e zonës së gjirit,” tha Marks.
Charles Zahn, kryetar i Portit të Corpus Christi dhe një përkrahës kryesor i shkripëzimit, tha se impiantet e shkripëzimit mund të jenë një ndihmë për rajonin, madje duke ofruar mundësinë për të shitur ujë në qytetin e San Antonio, nëse do kishte tepricë.
“Ne kemi nevojë për shkripëzimin për të sjellë industrinë që na sjell punë dhe rrit bazën tonë të taksave,” tha ai.
“Unë mendoj se uji është ndoshta problemi numër një në Teksas dhe ne kemi aftësinë për të ndihmuar Teksasin.”
VINI RE: Ky material është pronësi intelektuale e Reuters
