Policia e Shtetit në bashkëpunim me AKBN dhe AKSEM ka bllokuar pas inspektimit guroren në pronësi të fisit “Rraja” në Borizanë të Krujës.
U desh rrahja e dy qytetarëve që kishin denoncuar për javë me radhë aktivitetin që po i prishte shtëpitë, që strukturat të reagonin për të inspektuar dhe më pas të vendosin të mbyllnin aktivitetin.
Qytetarët shtëpitë e të cilëve ishin pranë kësaj guroreje e cila shpërthente mina për të marrë masive gurësh e kishin denoncuar rastin edhe në polici më herët, por disa ditë më parë dy prej tyre u rrahën me shkopinj nga pronarët e kësaj guroreje që ishte në pronësi të të afërmeve të deputetit (tashmë i dorëhequr) Rrahman Rraja.
Ky rast solli shkrirjen e strukturës zbatuese dhe drejtuese në stacionin e policisë Fushë Krujë si dhe shkarkimin e Ministrit të Brendshëm Bledi Çuçi.
“Strukturat e Drejtorisë Vendore të Policisë Tiranë, të mbështetura nga strukturat e Drejtorisë së Përgithshme të Policisë së Shtetit, në bashkëpunim me Agjencinë Kombëtare të Burimeve Natyrore dhe Autoritetin Kombëtar për Sigurinë dhe Emergjencat në Miniera, ushtruan kontroll ne subjektin gurore “Delia Group”, me administrator shtetasin V. D., me vendndodhje rreth 300 metra mbi fshatin Borizanë, Njësia Administrative Thumanë, Bashkia Krujë.
Pas këqyrjes së sipërfaqjes ku kryhet aktiviteti i gurores, si dhe të dokumentacionit të saj, u vendos bllokimi i subjektit deri në përgatitjen e dokumentacionit dhe vlerësimit të tij, nga ana e AKBN dhe AKSEM.
Përveç kontrollit në këtë gurore u bë këqyrja e 9 (nëntë) banesave, të cilat dyshohet se janë dëmtuar nga aktiviteti i kësaj guroreje.
Gjatë këqyrjes morën pjesë edhe specialistë të Agjencisë Kombetare të Burimeve Natyrore, të cilët bënë matjet për të përcaktuar distancën midis guroreve dhe banesave objekt këqyrje.
Aktet procedurale të përpiluara do të referohen në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, si pjesë e materialeve të referuara më parë, për ngjarjen e datës 02.05.2023”-njofton policia.
