Demonstruesit dolën në rrugë në Izrael të martën për atë që ata po e quajnë një ditë “përçarjeje dhe rezistence” kundër lëvizjeve të qeverisë për të riparuar sistemin gjyqësor të vendit.
Fotot dhe videot e publikuara nga organizatorët e protestës dhe Policia e Izraelit treguan demonstrues në rrugë në Tel Aviv, Petach Tikva dhe Beer Sheva, mes qyteteve të tjera. Të paktën 42 persona ishin arrestuar që nga ora 11:00 me orën lokale (04:00 ET), njoftoi Policia e Izraelit, sipas CNN.
Ligjvënësit votuan të hënën për t’i hequr Gjykatës së Lartë të drejtën për t’i shpallur veprimet e qeverisë “të paarsyeshme”, në të parën nga tre votat e nevojshme që projektligji i diskutueshëm të bëhet ligj.
Projektligji është një pjesë e një pakete gjithëpërfshirëse të masave të riparimit gjyqësor që do të dobësonte gjyqësorin. Kryeministri Benjamin Netanyahu dhe aleatët e tij i quajnë masat “reforma” dhe thonë se ato kërkohen për të ribalancuar fuqitë midis gjykatave, ligjvënësve dhe qeverisë. Por kundërshtarët e planit thonë se ai kërcënon ta kthejë Izraelin në një diktaturë duke hequr kontrollin më të rëndësishëm mbi veprimet e qeverisë.
Organizatorët thanë se kishin bllokuar autostradën Ayalon të martën, rrugë kryesore e Tel Avivit, dhe pohuan se policia nuk do të ishte në gjendje ta pastronte atë për shkak të numrit të protestuesve.
Demonstruesit planifikojnë të protestojnë në aeroportin ndërkombëtar të vendit, Ben Gurion, më vonë të martën.
Protesta të mëdha kundër agjendës janë zhvilluar në vend që nga fillimi i vitit. Netanyahu e ndërpreu procesin legjislativ në mars pas një greve të përgjithshme të paprecedentë që mbylli pjesën më të madhe të ekonomisë së Izraelit. Votimi i së hënës shënon fundin e asaj pauze.
