Gazetari i Wall Street Journal, Evan Gershkovich qëndron në një kafaz xhami në një sallë gjyqi në Gjykatën e Qytetit të Moskës në Moskë, Rusi, 22 qershor 2023
Presidenti i SHBA-së Biden tha të enjten se ai është serioz në lidhje me një shkëmbim të të burgosurve për të liruar një gazetar të Wall Street Journal, i cili është arrestuar në Rusi prej më shumë se 100 ditësh.
Kremlini sugjeroi në fillim të këtij muaji se ishte i hapur për një shkëmbim të mundshëm të të burgosurve që mund të përfshinte Evan Gershkovich, por nënvizoi se bisedime të tilla duhet të mbahen jashtë syve të publikut.
Duke folur në një konferencë shtypi në Helsinki të Finlandës, Biden e bëri të qartë se SHBA-të janë të interesuara për këtë shkëmbim.
“Unë jam serioz për një shkëmbim të burgosurish,” tha Biden, i cili po përfundon një vizitë katërditore në Evropë, që e çoi atë në Britani, Lituani dhe Finlandë.
“Dhe unë jam shumë serioz për të bërë gjithçka që mundemi për të liruar amerikanët që mbahen ilegalisht në Rusi ose kudo tjetër për këtë çështje, dhe ky proces është duke u zhvilluar.”
Gershkovich u arrestua nën akuzat për spiunazh në qytetin e Yekaterinburgut ndërsa ishte në një udhëtim raportimi. Ai po mbahet në burgun Lefortovo të Moskës, i njohur për kushtet e tij të vështira. Një gjykatë në Moskë kohët e fundit la në fuqi një vendim për ta mbajtur atë në paraburgim deri më 30 gusht.
Gershkovich dhe Wall Street Journal i mohojnë akuzat dhe qeveria amerikane ka deklaruar se ai është arrestuar gabimisht. Arrestimi i tij tronditi gazetarët në Rusi. Autoritetet atje nuk kanë ofruar asnjë provë për të mbështetur akuzat për spiunazh.
Këshilltari për sigurinë kombëtare të Shtëpisë së Bardhë, Jake Sullivan, konfirmoi javën e kaluar se ka pasur ‘diskutime’ midis dy palëve, por paralajmëroi se nuk ka ende ‘një rrugë të qartë’ për të fituar lirinë e Gershkovich.
Gershkovich është gazetari i parë amerikan që përballet me akuza për spiunazh në Rusi që nga shtatori i vitit 1986, kur Nicholas Daniloff, një korrespondent i Moskës për US News and World Report, u arrestua nga KGB. Daniloff u lirua 20 ditë më vonë në një shkëmbim, për një punonjës të misionit të Bashkimit Sovjetik në OKB, i cili u arrestua nga FBI, gjithashtu me akuza për spiunazh.
VINI RE: Ky material është pronësi intelektuale e Timesofisrael
Përgatiti për Hashtag.al, K.Manjani
