Rusia është gati të kalojë Arabinë Saudite si prodhuesi kryesor i naftës së papërpunuar OPEC+, tha Agjencia Ndërkombëtare e Energjisë në raportin e saj mujor të tregut të naftës javën e kaluar.
Prodhimi total i papërpunuar i Arabisë Saudite pritet të bjerë në 9 milionë fuçi në ditë (bpd) deri në korrik dhe gusht, pasi vendosi të zgjasë uljen e prodhimit në një përpjekje për të ekuilibruar çmimet, sipas vlerësimeve të IEA.
Ky vëllim i prodhimit do ishte më i ulëti që ka prodhuar mbretëria në dy vjet dhe do e bënte Rusinë prodhuesin kryesor të naftës në grupin e eksportuesve të naftës së papërpunuar OPEC +, tha agjencia.
Në fillim të këtij muaji, Riadi njoftoi se do zgjasë uljen vullnetare të prodhimit të papërpunuar prej 1 milion fuçi në ditë për një muaj tjetër për të përfshirë gushtin, ndërsa Rusia njëkohësisht njoftoi një pakësim prej 500,000 fuçi në ditë të eksporteve muajin e ardhshëm. Shkurtimet do arrijnë në 1.5% të furnizimit global.
Në qershor, Arabia Saudite prodhoi 9.98 milionë fuçi në ditë, ndërsa Rusia 9.45 milionë fuçi në ditë, sipas të dhënave të IEA-s.
Ministri saudit i Energjisë, Princi Abdulaziz bin Salman, më herët theksoi bashkëpunimin e thellë midis Riadit dhe Moskës si pjesë e grupit OPEC + dhe u zotua të bëjë ‘çfarëdo që është e nevojshme’ për të mbështetur tregun e naftës.
Raundi i fundit i shkurtimeve të naftës së papërpunuar vjen në krye të pakësimeve vullnetare prej 1.66 milionë fuçi në ditë që disa anëtarë të OPEC+ deklaruan fillimisht në prill dhe më pas ranë dakord të zgjasin deri në fund të vitit 2024.
