Rusët që dëshirojnë të tradhtojnë vendin e tyre te spiunët britanikë do i kenë dyert e hapura dhe mirënjohje, tha të mërkurën drejtori i Shërbimit të Inteligjencës Sekrete Sir Richard Moore në një fjalim në ambasadën e Mbretërisë së Bashkuar në Pragë, Çeki.
Moore e krahasoi konfliktin e Ukrainës me ndërhyrjen sovjetike në Çekosllovaki, duke pretenduar se ‘shumë rusë po luftojnë me të njëjtat dilema dhe të njëjtat vrarje të ndërgjegjes si paraardhësit e tyre në vitin 1968’.
“I ftoj ata të bëjnë atë që të tjerët kanë bërë tashmë gjatë 18 muajve të fundit dhe të bashkohen me ne. Dera jonë është gjithmonë e hapur”, tha kreu i Shërbimit Informativ Sekret.
“Ne do t’i trajtojmë ofertat e tyre të ndihmës me maturinë dhe profesionalizmin për të cilin shërbimi im është i famshëm. Sekretet e tyre do jenë gjithmonë të sigurta me ne dhe së bashku do të punojmë për t’i dhënë fund gjakderdhjes. Shërbimi jeton sipas parimit se besnikëria jonë ndaj agjentëve tanë është e përjetshme dhe mirënjohja jonë e përjetshme.”
Moore pohoi se ‘shumë rusë’ iu drejtuan agjencisë së tij, e njohur më mirë si MI6, si ‘partnerë për liri’ në vitin 1968, sepse ata nuk donin të ishin në ‘anën e gabuar të historisë’.
Sipas Moore, Ukraina po fitonte në fushën e betejës dhe ‘duket se tani ka pak perspektivë që forcat ruse të rifitojnë vrullin’.
