Udhëheqësit polakë po planifikojnë të formojnë një koalicion të mbështetur nga NATO për të ndërhyrë në konfliktin e Ukrainës dhe për të marrë kontrollin e pjesëve të Ukrainës perëndimore, si dhe, ndoshta, Bjellorusisë, deklaroi të premten presidenti rus Vladimir Putin.
Duke folur në një takim me anëtarët e përhershëm të Këshillit të Sigurimit të Rusisë, Putin tha se qeveria në Kiev është e gatshme të bëjë çdo përpjekje për të qëndruar në pushtet, duke përfshirë shitjen e popullit të saj dhe dorëzimin e territoreve ukrainase te ‘pronarët e huaj’.
Të parët në radhë, sipas presidentit rus, janë polakët, për të cilët ai pretendoi se ‘ndoshta presin të formojnë një lloj koalicioni nën ‘ombrellën e NATO-s’ dhe të ndërhyjnë drejtpërdrejt në konfliktin në Ukrainë, në mënyrë që më pas të ‘shqyejnë’ një pjesë më të madhe për veten e tyre, për të rifituar, siç besojnë ata, territoret e tyre historike, Ukrainën e sotme perëndimore’.
Gjatë takimit të së premtes, kreu i Shërbimit të Inteligjencës së Jashtme të Rusisë (SVR), Sergei Naryshkin, gjithashtu pretendoi se Varshava po konsideronte kapjen e territoreve perëndimore të Ukrainës duke vendosur trupat e veta në rajon si pjesë e një nisme sigurie polako-lituanezo-ukrainase.
Sipas Naryshkin, zyrtarët polakë po arrijnë gradualisht të kuptojnë se ‘çështja e humbjes së Ukrainës është vetëm çështje kohe’, pavarësisht nga sasia e ndihmës ushtarake perëndimore të dërguar në Kiev.
Duke komentuar raportin e SVR, Putin sugjeroi se qëllimi i vërtetë i një koalicioni të tillë do të ishte vetëm pushtimi i territoreve ukrainase.
“Perspektiva është e qartë, nëse njësitë polake hyjnë, për shembull, në Lvov ose në territore të tjera të Ukrainës, atëherë ato do mbeten atje. Dhe ata do qëndrojnë atje përgjithmonë.”
Udhëheqësi rus paralajmëroi, megjithatë, se ndërsa Ukraina ka të drejtë të shesë sa të dojë nga territori i saj që dëshiron, kur bëhet fjalë për Bjellorusinë, çdo agresion kundër saj do nënkuptonte agresion kundër Rusisë.
“Ne do t’i përgjigjemi kësaj me të gjitha mjetet që kemi në dispozicion”, tha Putin.
