Hakerët e lidhur me Pekinin kanë arritur të kenë qasje në llogarinë e emailit të ambasadorit të SHBA-së në Kinë, Nicholas Burns, në një sulm që besohet se ka komprometuar të paktën qindra mijëra emaile individuale të qeverisë amerikane, sipas njerëzve të njohur me këtë çështje.
Daniel Kritenbrink, ndihmës Sekretari i Shtetit për Azinë Lindore, gjithashtu u hakerua në sulmin kibernetik të spiunazhit, thanë njerëzit. Dy diplomatët besohet të jenë dy zyrtarët më të lartë në Departamentin e Shtetit të shënjestruar në fushatën e supozuar të spiunazhit të zbuluar javën e kaluar, tha një nga personat.
Konturet e fushatës kibernetike nuk dihen plotësisht. Ndonëse të kufizuara në emaile të paklasifikuara, emailed hyrëse të Burns dhe Kritenbrink mund t’i kenë lejuar hakerat të mbledhin njohuri mbi planifikimin e SHBA-së për një varg vizitash të fundit në Kinë nga zyrtarë të lartë të administratës Biden, si dhe biseda të brendshme rreth politikave të SHBA-së ndaj rivalit të saj, mes një periudhe diplomacie delikate muajt e fundit.
Burns dhe Kritenbrink janë zyrtarët e dytë dhe të tretë të lartë të administratës Biden që identifikohen në raportet e lajmeve se u janë hakuar emailet. Emaili i Sekretares së SHBA-së Gina Raimondo gjithashtu u komprometua në operacion, thanë zyrtarët amerikanë.
Dukej se llogaria e postës elektronike e Sekretarit të Shtetit Antony Blinken nuk ishte infiltruar drejtpërdrejt gjatë hakerimit, as ajo e atyre në rrethin e tij të këshilltarëve kryesorë, tha një nga njerëzit e njohur me këtë çështje. Në vend të kësaj, hakerët dukej se ishin përqendruar në një numër të vogël zyrtarësh të lartë përgjegjës për menaxhimin e marrëdhënieve SHBA-Kinë.
Vlerësimi i emaileve individuale të aksesuara është i përafërt dhe gjithashtu mund të rritet, thanë njerëzit.
“Për arsye sigurie, ne nuk do e ndajmë informacion shtesë mbi natyrën dhe shtrirjen e këtij incidenti të sigurisë kibernetike në këtë moment”, tha një zëdhënës i Departamentit të Shtetit.
“Departamenti mbikëqyr vazhdimisht dhe i përgjigjet aktivitetit shqetësues në rrjetet tona. Hetimi ynë është në vazhdim dhe nuk mund të japim hollësi të mëtejshme për momentin.”
Këshilli i Sigurisë Kombëtare i Shtëpisë së Bardhë nuk pranoi të komentojë.
Kritenbrink shoqëroi Blinken në udhëtimin e tij në Kinë një muaj më parë, dhe Kritenbrink, Burns dhe Blinken të gjithë morën pjesë në takime me zyrtarë të lartë kinezë dhe me udhëheqësin kinez Xi Jinping. Përpara bisedimeve të nivelit të lartë në Pekin, Kritenbrink udhëhoqi një udhëtim të zyrtarëve të një niveli më të ulët për të shtruar bazën e takimeve të rëndësishme.
Departamenti i Shtetit ka udhëhequr përpjekjet e administratës Biden për të rritur komunikimet me Kinën dhe për të arritur përparim në fusha të caktuara, duke përfshirë ndryshimet klimatike dhe tregtinë e opioideve sintetike.
Mosmarrëveshjet e thella rreth Tajvanit, spiunazhit dhe çështjeve të tjera kanë çuar në një përkeqësim të marrëdhënieve, me shqetësimet e gjera politike të SHBA-së rreth Kinës që parandalojnë çdo ndryshim të prirjes, thonë zyrtarët.
Hakerimi i fundit u krye duke përdorur një të metë në mjedisin e kompjuterave cloud të Microsoft dhe që atëherë është rregulluar, sipas kompanisë, e cila tha se më shumë se dy duzina organizata globalisht u prekën.
Më pak se 10 organizata u komprometuan në SHBA dhe secila prej tyre dukej se kishte një numër të vogël llogarish individuale të postës elektronike të aksesuara drejtpërdrejt nga hakerët, tha javën e kaluar një zyrtar i lartë amerikan i sigurisë kibernetike. Nuk dihet nëse ndonjë agjenci federale përtej departamenteve të Shtetit dhe Tregtisë ishte në shënjestër.
Microsoft nuk ka bërë të ditur publikisht se si filloi shkelja dhe ka thënë se po vazhdon të hetojë incidentin.
Zyrtarët amerikanë e kanë përshkruar sulmin si të një natyre kirurgjikale – diçka që synonte një numër të vogël viktimash me rëndësi të madhe, të përzgjedhur posaçërisht, dhe kanë kërkuar të zvogëlojnë ndikimin e tij të përgjithshëm, duke e krahasuar atë me spiunazhin rutinë dixhital që po ndodh vazhdimisht midis kombeve kundërshtare.
Por ekspertët e sigurisë dhe ish-zyrtarët e inteligjencës kanë thënë se sulmi dukej të ishte jashtëzakonisht i fshehtë dhe mbresëlënës dhe vunë në dukje kohën e tij gjatë një rritjeje të kontaktit diplomatik midis SHBA-së dhe Kinës pas muajve të rënies së marrëdhënieve për luftën në Ukrainë, zbulimit dhe rrëzimit të asaj që ai u tha se ishte një balonë vëzhgimi kineze dhe zbulimet e rritjes së bashkëpunimit të inteligjencës kineze me Kubën.
Shtetet e Bashkuara nuk e kanë fajësuar zyrtarisht Kinën për hakerimin, por zyrtarë të lartë të administratës Biden thanë se nuk kanë arsye të dyshojnë në vlerësimin e Microsoft që e lidh atë me një grup hakerimi kinez. Kina i ka mohuar akuzat dhe ka akuzuar SHBA-në për përfshirje në spiunazh të shfrenuar kibernetik në të gjithë botën.
Specialistët e sigurisë kibernetike në Departamentin e Shtetit ishin të parët që zbuluan fushatën e spiunazhit. Microsoft tha se hakerimi filloi në maj, por nuk u zbulua deri në mes të qershorit, një datë që përputhej ngushtë me kohën e udhëtimit të Antony Blinken në Kinë, Sekretari i parë i Shtetit që vizitoi Pekinin në pesë vjet.
VINI RE: Ky material është pronësi intelektuale e WSJ
Përgatiti për Hashtag.al, K,Manjani
