Autoritetet thanë se një person i zhdukur, trupi i të cilit u gjet në një liqen në komunitetin turistik të Massachusetts në Martha’s Vineyard, ishte kuzhinieri personal i ish-presidentit Barack Obama.
Tafari Campbell, 45 vjeç, ishte subjekt i një kërkimi dy-ditor pasi një vozitës me kajak u pa të luftonte dhe zhytej nën ujë në Edgartown Great Pond pranë një shtëpie në pronësi të familjes Obama të dielën mbrëma.
Ai kishte qenë kuzhinier në Shtëpinë e Bardhë dhe erdhi për të punuar për familjen pasi Obama përfundoi mandatin e tij të dytë në vitin 2016, thanë në një deklaratë të hënën ish-presidenti dhe gruaja e tij, Michelle Obama.
“Tafari ishte një pjesë e dashur e familjes sonë,” tha familja Obama në një deklaratë të përbashkët.
“Ai ishte krijues dhe i pasionuar pas ushqimit dhe kishte aftësinë për të bashkuar njerëzit. Në vitet që pasuan, ne e njohëm atë si një person të ngrohtë, argëtues, jashtëzakonisht të sjellshëm që na e bëri të gjithë jetën më të ndritshme.”
Zhytësit filluan të kërkonin për Campbell të dielën, pasi morën një telefonatë se një burrë me kajak kishte hyrë në ujë dhe më pas dukej se po luftonte para se të zhytej, tha policia. Ai nuk doli më sipër ujit.
Trupi i Campbell u gjet në Edgartown Great Pond të hënën, tha Policia e Shtetit të Massachusetts.
Në kohën e vdekjes së tij, Campbell, i cili jetonte në Dumfries, Virxhinia, po vizitonte Martha’s Vineyard, por familja Obama nuk ishte e pranishme, tha Policia e Shtetit të Massachusetts.
Vdekja e tij është duke u hetuar nga autoritetet, tha policia.
