Google po provon një produkt që përdor teknologjinë e inteligjencës artificiale për të prodhuar lajme, duke ia ofruar atë kompanive të ndryshme mediatike, përfshirë New York Times, Washington Post dhe pronarin e Wall Street Journal, News Corp, sipas tre personave të njohur me këtë çështje.
Mjeti, i njohur nga brenda me emërtimin ‘Genesis’, mund të marrë informacion – hollësi të ngjarjeve të kohës dhe të prodhojë përmbajtje lajmesh, thanë njerëzit, duke folur në kushte anonimiteti.
Një nga tre personat e njohur me produktin tha se Google besonte se ai mund të shërbente si një lloj asistenti personal për gazetarët, duke automatizuar disa detyra për të liruar kohë për të tjerat dhe se kompania e shihte atë si teknologji të përgjegjshme që mund të ndihmonte në largimin e industrisë së botimeve nga grackat e inteligjencës artificiale gjeneruese.
Disa drejtues që e panë paraqitjen e Google e përshkruan atë si shqetësuese, duke kërkuar që të mos identifikoheshin teksa diskutonin për çështjen konfidenciale. Dy persona thanë se dukej se e merrte si të mirëqenë përpjekjen që u bë për të prodhuar lajme të sakta.
Jenn Crider, një zëdhënëse e Google, tha në një deklaratë se ‘në partneritet me botuesit e lajmeve, veçanërisht botuesit më të vegjël, ne jemi në fazat më të hershme të eksplorimit të ideve për të ofruar mundësisht mjete të inteligjencës artificiale për të ndihmuar gazetarët në punën e tyre’.
“Thjesht, këto mjete nuk synojnë dhe nuk mund të zëvendësojnë rolin thelbësor që kanë gazetarët në raportimin, krijimin dhe kontrollimin e fakteve të shkrimeve të tyre,” shtoi ajo.
Në vend të kësaj, ata mund të ofrojnë mundësi për titujt dhe stilet e tjera të shkrimit.
Një zëdhënës i News Corp tha në një deklaratë: “Ne kemi një marrëdhënie të shkëlqyer me Google dhe vlerësojmë angazhimin afatgjatë të Sundar Pichai ndaj gazetarisë”.
The Times dhe The Post nuk pranuan të komentojnë.
Jeff Jarvis, një profesor i gazetarisë dhe komentator i medias, tha se mjeti i ri i Google, siç përshkruhet, kishte të mirat dhe të këqijat e mundshme.
“Nëse kjo teknologji mund të japë informacion faktik në mënyrë të besueshme, gazetarët duhet ta përdorin mjetin,” tha z. Jarvis, drejtor i Qendrës Toë-Knight për Gazetari Sipërmarrëse në shkollën e Gazetarisë ‘Craig Newmark’ në Universitetin e Nju Jorkut.
“Nëse, nga ana tjetër, keqpërdoret nga gazetarët dhe organizatat e lajmeve për tema që kërkojnë nuanca dhe mirëkuptim kulturor”, vazhdoi ai, “atëherë mund të dëmtojë besueshmërinë jo vetëm të mjetit, por edhe të organizatave të lajmeve që e përdorin atë”.
Organizatat e lajmeve anembanë botës po luftojnë nëse duhet të përdorin mjete të inteligjencës artificiale në redaksitë e tyre. Shumë, duke përfshirë The Times, NPR dhe Insider, kanë njoftuar punonjësit se ata synojnë të eksplorojnë përdorime të mundshme të inteligjencës artificiale për të parë se si mund të zbatohet me përgjegjësi në fushën e lajmeve ku numërimi i sekondave dhe saktësia është parësore.
Por mjeti i ri i Google me siguri do nxisë ankthin gjithashtu, tek gazetarët që i kanë shkruar vetë artikujt për dekada. Disa organizata lajmesh, duke përfshirë Associated Press, kanë përdorur prej kohësh inteligjencën artificiale për të prodhuar histori për çështje të ndryshme, duke përfshirë raportet e fitimeve të korporatave, por ato mbeten një pjesë e vogël e shkrimeve në krahasim me ato të krijuara nga gazetarët.
Inteligjenca artificiale mund ta ndryshojë këtë, duke u mundësuar përdoruesve të prodhojnë shkrime në një shkallë më të gjerë që, nëse nuk modifikohen dhe kontrollohen me kujdes, mund të përhapin dezinformata dhe të ndikojnë në mënyrën se si perceptohen tregimet e shkruara tradicionalisht.
Teksa Google ka lëvizur me një ritëm të mrekullueshëm për të zhvilluar dhe përdorur inteligjencën artificiale prodhuese, teknologjia ka paraqitur gjithashtu disa sfida për mashtruesit me reklamat.
Ndërsa Google tradicionalisht ka luajtur rolin e kurimit të informacionit dhe dërgimit të përdoruesve në faqet e internetit të botuesve për të lexuar më shumë, mjetet si chatbot i tij, Bard, paraqesin pohime faktike që ndonjëherë janë të pasakta dhe nuk dërgojnë trafik në burime më autoritative, siç janë botuesit e lajmeve.
Teknologjia është prezantuar pasi qeveritë në mbarë botën i kanë kërkuar Google që t’u japë mediave një pjesë më të madhe të të ardhurave të saj nga reklamat. Pasi qeveria australiane u përpoq të detyronte Google të negocionte me botuesit mbi pagesat në vitin 2021, kompania krijoi më shumë partneritete me organizatat e lajmeve në vende të ndryshme, nën programin e saj Neës Shoëcase.
Botuesit dhe krijuesit e tjerë të përmbajtjes kanë kritikuar tashmë Google dhe kompanitë e inteligjencës artificiale për përdorimin e shkrimeve dhe postimeve të tyre për të ndihmuar në trajnimin e këtyre sistemeve të inteligjencës artificiale, pa kompensuar botuesit. Organizatat e lajmeve, duke përfshirë NBC News dhe The Times, kanë marrë një pozicion kundër thithjes së të dhënave nga inteligjenca artificiale pa leje.
VINI RE: Ky material është pronësi intelektuale e NY Times
Përgatiti për Hashtag.al, K.Manjani
