Tre persona u plagosën në Izrael pasi një shofer u përplas me një turmë protestuesish gjatë një mitingu kundër reformës shumë të diskutueshme gjyqësore të vendit. Përleshjet me policinë shpërthyen gjatë demonstratave në disa qytete, duke çuar në dhjetëra arrestime.
Incidenti ndodhi të hënën mbrëma pranë qytetit Kfar Saba, që ndodhet rreth 16 kilometra në verilindje të Tel Avivit, ku një grup demonstruesish u mblodhën për të marshuar kundër rishikimit gjithëpërfshirës gjyqësor që kalon nëpër parlamentin e Izraelit, Knesset.
Në një video të sulmit që qarkullon në internet, një automjet i bardhë shihet duke përshpejtuar mes turmës dhe mbi një zjarr të vogël, duke ndezur një shtëllungë flake ndërsa protestuesit iknin në panik. Tre persona janë ‘plagosur lehtë’ në përplasje, raportoi Haaretz, duke cituar policinë.
Një i dyshuar mashkull rreth të 20-ave u arrestua, tha policia lokale për median. Gazetari izraelit Noga Tarnopolsky më vonë e përshkroi të riun si një ‘kolon në Bregun Perëndimor’.
Mijëra izraelitë dolën për protesta në qytete të shumta ndërsa ligjvënësit kaluan të hënën pjesën e parë të reformës së re gjyqësore. Ligji, i cili vendos kufizime të mëdha në mbikëqyrjen e veprimeve të qeverisë nga Gjykata e Lartë, ka qenë subjekt i debateve dhe polemikave të ashpra që kur u propozua në fillim të këtij viti, duke shkaktuar një valë demonstratash në gjithë vendin.
Të paktën 34 persona u arrestuan të hënën, ndërsa policia përdori makinat ujëhedhëse ndaj protestuesve në Tel Aviv dhe Jerusalem, raportuan mediat vendase. Policia në Tel Aviv tha se dhjetë oficerë u plagosën gjatë përleshjeve.
