Një gjykatë në Moskë ka dënuar Ilya Sachkov, një bashkëthemelues i një prej firmave më të mëdha ruse të sigurisë kibernetike, Group-IB, me 14 vjet burg për tradhti, njoftuan agjencitë e lajmeve të mërkurën.
Sachkov do vuajë dënimin e tij në një koloni penale të sigurisë së lartë dhe do duhet të paguajë një gjobë prej 500,000 rublash (5,560 dollarë), sipas vendimit të Gjykatës së Moskës. Seanca është zhvilluar me dyer të mbyllura dhe materialet gjyqësore janë të klasifikuara.
Sipërmarrësi i sigurisë kibernetike u arrestua në vitin 2021 me dyshimin se u kishte kaluar informacione të klasifikuara spiunëve të huaj. Sipas prokurorisë, Saçkov mblodhi dhe transmetoi informacione që përbënin sekret shtetëror për shërbimet e huaja të inteligjencës në vitin 2011. Saçkov i mohoi akuzat.
Sipas Bloomberg, gjyqi mund të lidhet me transferimin e informacionit në SHBA për një grup hakerash që dyshohet se është i lidhur me inteligjencën ruse dhe akuzohet për sulme kibernetike gjatë zgjedhjeve presidenciale të 2016-ës në SHBA.
Sachkov nuk është më i lidhur me Group-IB pasi firma doli nga tregu rus në prill. Një firmë e re, F.A.C.C.T. (Lufta kundër teknologjive të krimit kibernetik), u themelua në vend të saj me Saçkov si aksioner. Group-IB lëshoi një deklaratë duke dënuar vendimin e gjykatës të së mërkurës, ndërsa F.A.C.C.T. tha se mbrojtja do të apelojë vendimin.
