Arabia Saudite do të mirëpresë bisedimet në gusht për Ukrainën, duke ftuar shtetet perëndimore, Ukrainën dhe vendet e mëdha në zhvillim, përfshirë Indinë dhe Brazilin, raportoi të shtunën Wall Street Journal.
Takimi do të sjellë zyrtarë të lartë nga deri në 30 vende, duke përfshirë Indonezinë, Egjiptin, Meksikën, Kilin dhe Zambinë, në Jeddah më 5 dhe 6 gusht, thuhet në raport, duke cituar diplomatë të përfshirë në diskutim.
Ukraina dhe zyrtarët perëndimorë shpresojnë se bisedimet, të cilat përjashtojnë Rusinë, mund të çojnë në mbështetje ndërkombëtare për kushtet e paqes që favorizojnë Ukrainën, thuhet në raportim.
Kremlini, i cili pretendon se ka aneksuar rreth një të gjashtën e Ukrainës, ka thënë se i sheh bisedimet e paqes me Ukrainën si të mundshme vetëm nëse Kievi pranon “realitete të reja”, duke iu referuar pretendimeve territoriale të Moskës. Kievi thotë se negociatat me Rusinë do të jenë të mundshme vetëm pasi Moska të tërheqë trupat e saj.
Në mesin e vendeve të ftuara, nuk është ende e qartë se sa do të marrin pjesë, megjithëse vendet që morën pjesë në një raund të ngjashëm bisedimesh në Kopenhagë në qershor pritet ta bëjnë këtë përsëri, thuhet në raport.
Britania, Afrika e Jugut, Polonia dhe BE-ja janë midis atyre që kanë konfirmuar pjesëmarrjen dhe këshilltari i sigurisë kombëtare të SHBA-së, Jake Sullivan pritet të marrë pjesë, vijon raportimi.
