Jake Sullivan, këshilltari i sigurisë kombëtare i SHBA-së, pritet të marrë pjesë në një takim në Arabinë Saudite këtë fundjavë, në të cilin Ukraina dhe aleatët e saj do të përpiqen të bindin vendet e jugut që të mbështesin propozimet e Kievit për t’i dhënë fund luftës.
Sipas zyrtarëve të përfshirë në planifikimin e takimit, ai synon kryesisht të tërheqë vendet neutrale si Brazili dhe India nga gardhi në qasjen e tyre ndaj pushtimit rus.
Takimi është thirrur nga Ukraina dhe shpresohet se vendi saudit mund të tërheqë pjesëmarrjen kineze, por deri më tani nuk ka asnjë konfirmim se Pekini do të dërgojë ndonjë përfaqësues, sipas The Guardian.
Sipas Wall Street Journal, e cila raportoi fillimisht bisedimet e planifikuara, Arabia Saudite dhe Ukraina kanë ftuar 30 vende, duke përfshirë Indonezinë, Egjiptin, Meksikën, Kilin dhe Zambinë.
Takimi i zyrtarëve të lartë të sigurisë pritet të zhvillohet në Jeddah dhe nëse Sullivan, këshilltari amerikan për sigurinë kombëtare, merr pjesë personalisht, do të jetë udhëtimi i tij i dytë në qytetin port të Detit të Kuq brenda 10 ditëve. Të enjten, ai zhvilloi bisedime me Mohammed bin Salman, princin e kurorës dhe zyrtarë të tjerë sauditë mbi stabilitetin në Lindjen e Mesme.
“Ne presim që të pranishmit të diskutojnë mbi parimet për paqen dhe se si mund të arrijmë një paqe të drejtë dhe të qëndrueshme në Ukrainë”, tha një zyrtar amerikan.
Dmitry Peskov, zëdhënësi i Kremlinit, tha se Moska do të monitorojë takimin.
“Mbetet për t’u kuptuar plotësisht se cilat synime janë vendosur dhe për çfarë, në fakt, organizatorët planifikojnë të flasin”, tha Peskov.
Takimi i Jeddah do të shënojë të dytin në një seri bisedimesh shumëpalëshe të thirrura nga Ukraina në një përpjekje për të zgjeruar mbështetjen globale për një plan paqeje prej 10 pikash të propozuar nga Volodymyr Zelenskiy në dhjetor, që synon rivendosjen e integritetit territorial të Ukrainës dhe garancive për sigurinë bërthamore. sigurinë e ushqimit dhe energjisë.
“Tani po punojmë shumë për të përfshirë sa më shumë partnerë nga perëndimi dhe jugu global në negociatat në [Arabinë Saudite]”, tha në mediat sociale Andriy Yermak, kreu i zyrës presidenciale të Ukrainës.
Raundi i parë i bisedimeve u zhvillua në Kopenhagen në fund të qershorit dhe morën pjesë zyrtarë nga Brazili, India, Arabia Saudite, Afrika e Jugut dhe Turqia. Ndërsa Kina ishte e ftuar por nuk mori pjesë.
Yermak tha se Ukraina shpresonte që takimet e këshilltarëve të sigurisë kombëtare përfundimisht do të çonin në një samit, të ndërtuar rreth versionit të Kievit të një marrëveshjeje paqeje, e cila do të kërkonte tërheqjen e trupave ruse si parakusht për negociatat thelbësore.
