Presidenti i SHBA-së Joe Biden e quajti Kanionin e Madh ‘një nga nëntë mrekullitë e Tokës’ në një fjalim të mbushur me gafa të martën, teksa ai promovoi një urdhër ekzekutiv të fundit që cakton mënjanë mbi një milion hektarë tokë aty pranë si monument kombëtar.
“Njerëz, nuk është hiperbolë të sugjerosh se nuk ka asnjë thesar kombëtar, asnjë, që është më madhështor se Grand Canyon,” u tha Biden qytetarëve të mbkedhur në Arizona përpara se të largohej pak nga skenari, duke shtuar: “Grand Canyon – një nga nëntë mrekullit e Tokës, mendoni për këtë.”
Ai më vonë e korrigjoi veten, duke pranuar, ‘në fakt, unë thashë nëntë. Është një nga shtatë mrekullitë e botës’.
Dukej se Biden e kishte të vështirë të lexonte teleprompterin e tij, pasi më vonë përshkroi sesi zona e Grand Canyon ishte ‘një strehë e specieve si lakuriqët e natës, bizonët, delet e mëdha dhe gati 450 lloje zogjsh, duke përfshirë shqiponjat’.
Presidenti nënshkroi një urdhër ekzekutiv të martën duke përcaktuar 917,000 hektarë tokë publike rreth Parkut Kombëtar Grand Canyon si një monument të ri kombëtar të quajtur Baaj Nwaavjo I’tah Kukveni (Gjurmët e Paraardhësve të Monumentit Kombëtar të Kanionit të Madh).
Ndërsa grupet indigjene vlerësuan masën për mbrojtjen e tokave të shenjta, kritikët, përfshirë Senatorin republikan Mitt Romney, vunë në dukje se ai mbylli ‘një nga zonat më produktive të minierave të uraniumit në vend’ dhe do vendoste ‘kufizime të rënda’ në blegtorët që përdornin tokën për kullotje.
Megjithatë, administrata Biden pretendoi se të drejtat ekzistuese të minierave, kullotave dhe gjuetisë do të respektoheshin.
Presidenti njoftoi gjithashtu një investim prej 44 milionë dollarësh për të ‘forcuar qëndrueshmërinë klimatike në të gjithë sistemin tonë të parkut kombëtar’ duke përdorur fondet nga Akti i Reduktimit të Inflacionit, duke vënë në dukje valën e fundit të të nxehtit dhe duke deklaruar se qeveria po “përmbushte” premtimet e saj të gjelbra.
Biden është bërë famëkeq për ngatërrimin e shpeshtë gjatë fjalimeve. Në moshën 80-vjeçare, ai është presidenti më i vjetër i SHBA-së ndonjëherë, dhe vitet e tij kanë bindur madje shumë demokratë se nuk do të ishte e mençur që ai të kërkonte një mandat të dytë.
Një sondazh i qershorit i kryer nga Washington Post-ABC zbuloi se vetëm 32% e votuesve besonin se ai kishte mprehtësinë mendore të nevojshme për të qenë president, krahasuar me 54% për rivalin e tij në 2020, ish-presidentin Donald Trump.
Biden muajin e kaluar i bëri thirrje Rusisë që të “ndalojë sulmet e saj çnjerëzore ndaj Rusisë”, pasi më parë kishte deklaruar se Moska “po e humbiste luftën në Irak”. Mediat amerikane kanë luftuar për të mbuluar boshllëqet e tij të dukshme në të kuptuarit e ngjarjeve botërore.
