Një efektiv policie është plagosur mbrëmjen e djeshme në zonën e Pilurit. Autori i dyshuar është arrestuar pak orë më vonë në një operacion policor.
Ai u qëllua jashtë orarit të shërbimit pas ndërhyri për të parandaluar përshkallëzimin e një konflikti mes dy personave.
28-vjeçari me iniciale R.Ç. i policisë së Lukovës u qëllua me thika nga 60-vjeçari Theodhori Mërkuri e është dërguar në spital në gjendje të rëndë.
Autori i dyshuar u largua nga vendi i ngjarjes duke përfituar nga errësira ndërsa është arrestuar orët e para të mëngjesit të sotëm.
Njoftimi
“Punonjësi i Policisë, i cili ishte jashtë shërbimit ndërhyri për të parandaluar përshkallëzimin e një konflikti pas 8 orësh ndjekje nga Policia, lokalizohet, kapet dhe vihet në pranga 60-vjeçari.
Menjëherë pas ngjarjes së ndodhur në orët e vona të mbrëmjes së djeshme, në fshatin Pilur, ku mbeti i plagosur rëndë me mjet prerës një punonjës policie 25 vjeç, me detyrë inspektor i Policisë së zonës në Lukovë, shërbimet e Komisariatit të Policisë Himarë, shërbimet operacionale të DVP Vlorë dhe grupe të FNSH-së, kanë organizuar punën për kapjen e autorit.
Pas 8 orësh kërkime dhe ndjekje, shërbimet e Policisë, mëngjesin e sotëm, lokalizuan, kapën dhe vunë në pranga 60-vjeçarin Th. M., i cili ishte fshehur në ambientet e ish-repartit ushtarak në fshatin Pilur.
Në vijim të veprimeve, specialistët e Seksionit për Hetimin e Krimeve kundër Jetës të DVP Vlorë, në bashkëpunim me specialistët për Hetimin e Krimeve të Komisariatit të Policisë Himarë, kanë arrestuar në flagrancë 60-vjeçarin Th. M., për veprën penale “Vrasja e punonjësve të Policisë së Shtetit”, mbetur në tentativë.
Gjithashtu, është arrestuar në flagrancë shtetasi A. P., 39 vjeç, banues në fshatin Pilur, për veprën penale “Moskallëzimi i krimit”.”
