Identifikimi i të vrarëve në zjarret Maui do jetë shumë i vështirë dhe ka të ngjarë të marrë javë, tha të martën guvernatori i Hawai-t, ndërsa numri i të vdekurve u rrit në 106 dhe familjeve që prisnin dëshpërimisht për të dëgjuar për të dashurit e humbur iu kërkua të siguronin mostra të ADN-së.
Një ekip gjenetik do ndihmojë në identifikimin e viktimave, tha për CNN guvernatori i Hawai-t, Josh Green, pasi rreth 185 punonjës kërkim-shpëtimi dhe 20 qen për kërkimin e kufomave vazhduan të krehin hirin e shtëpive dhe bizneseve të djegura nga zjarri më vdekjeprurës në SHBA në më shumë se një shekull.
Identifikimi është sfidues sepse mbetjet janë kryesisht të panjohura dhe gjurmët e gishtërinjve gjenden rrallë, tha Green. Hetuesit duhet të zhvillojnë profile të ADN-së nga eshtrat dhe shpresojmë të gjejnë përkatësi, duke përfshirë çdo ADN të ofruar nga të afërmit e të zhdukurve, kanë thënë zyrtarët.
Vetëm pesë nga 106 të vdekurit ishin identifikuar deri të martën pasdite, sipas zyrtarëve të qarkut Maui. Dy u emëruan publikisht dhe emrat e tre të tjerëve do shpallen kur të njoftohen familjet e tyre, tha qarku.
Anëtarët e familjeve të personave të zhdukur kishin siguruar 41 mostra të ADN-së, thanë zyrtarët e qarkut. Ndërkohë, numri i personave ende të pagjetur është i paqartë, thonë autoritetet.
Zjarret filluan të përhapen në mënyrë të egër më 8 gusht dhe shkatërruan pjesët historike të Lahainas në Mauin perëndimor.
