Sekretari amerikan i Shtetit Antony Blinken foli në telefon me Paul Whelan të mërkurën, ka konfirmuar vëllai i Whelan, David. Rusia e dënoi ish-marinsin amerikan për spiunazh në vitin 2020 dhe e dënoi me 16 vjet burg. Uashingtoni e konsideron atë ‘si të arrestuar gabimisht’ dhe po përpiqet të negociojë lirimin e tij.
“Kam qenë në dijeni që telefonata ka ndodhur. Unë nuk di asgjë, përveç se Paul me sa duket kishte një bisedë të sinqertë me Sekretarin e Shtetit Blinken,” tha David Whelan për RIA Novosti, duke shtuar se Blinken është ‘një person shumë i sjellshëm’ që gjen kohë nga programi i tij i zënë për të bërë një telefonatë me të vëllain e burgosur.
Departamenti i Shtetit ende nuk ka dhënë ndonjë deklaratë zyrtare në lidhje me telefonatën. Sipas CNN, e cila citoi një burim të njohur me telefonatën, Blinken i tha Whelan që ‘të ruante besimin’ dhe se SHBA ‘po bëjnë gjithçka që munden për ta sjellë në shtëpi sa më shpejt të jetë e mundur’.
Whelan u arrestua në dhjetor 2018, pasi pranoi një usb nga një oficer i fshehtë i Shërbimit Federal të Sigurisë Ruse (FSB).
Avokati i tij mbrojtës këmbënguli se Whelan kishte menduar se ajo përmbante foto nga një ngjarje që ai mori pjesë me një mik rus dhe argumentoi se ai ishte viktimë e kurthit. Prokurorët thanë se Whelan po mblidhte informacione shumë sekrete për anëtarët aktivë të FSB-së. Ai u shpall fajtor në qershor 2020.
SHBA e ka cilësuar Whelan si ‘të arrestuar gabimisht’, duke sugjeruar se akuzat kundër tij ishin të motivuara politikisht. Ambasadorja Lynne Tracy e vizitoi atë në maj në burgun rus, duke u thënë mediave se lirimi i tij është ‘një prioritet absolut’ për Uashingtonin.
Whelan u la jashtë shkëmbimit të të burgosurve të dhjetorit 2022, në të cilin Uashingtoni shkëmbeu biznesmenin rus Viktor Bout me kontrabanduesin e dënuar të drogës dhe yllin e basketbollit Brittney Griner.
SHBA thuhet se ka konsideruar ‘lehtësimin e sanksioneve të ngushta’ dhe ka kontaktuar aleatët që mbajnë spiunë të dyshuar rusë në mënyrë që të mundësojnë një shkëmbim për Whelan dhe një gazetar që gjithashtu përballet me akuza për spiunazh. Në prill, Rusia tha se kapi gazetarin e Wall Street Journal, Evan Gershkovich, ‘me presh në duar’ duke u përpjekur të merrte sekrete shtetërore rreth operacioneve të industrisë ushtarake.
Duke komentuar spekulimet për një shkëmbim të mundshëm në disa media amerikane të mërkurën, ambasadori rus në Uashington, Anatoli Antonov, tha se çështja po trajtohej nga ‘agjencitë e autorizuara’.
“Ne u bëjmë thirrje politikanëve dhe mediave amerikane që të lejojnë autoritetet kompetente të dy vendeve të punojnë në paqe. Mos luani me fatet e njerëzve dhe lëreni kërkimin e ‘zgjidhjeve’ tek profesionistët”, tha Antonov.
