NATO do vijojë të armatosë Ukrainën derisa Kievi të vendosë se është koha e duhur për të hyrë në bisedime me Rusinë, deklaroi të enjten Sekretari i Përgjithshëm Jens Stoltenberg.
Deklarata erdhi pasi ndihmësi kryesor i Stoltenberg sugjeroi në dukje një marrëveshje me anë të së cilës Ukraina do braktiste pretendimet e saj territoriale në këmbim të anëtarësimit në bllokun e udhëhequr nga SHBA-ja.
Duke folur për mediat norvegjeze, Stoltenberg tha se përparësia e NATO-s është ‘të mbështesë Ukrainën ushtarakisht’, duke shtuar se ‘nëse doni një paqe të qëndrueshme, të drejtë, atëherë mbështetja ushtarake për Ukrainën është mënyra për të arritur atje. Nuk ka dyshim për këtë’.
“Është Ukraina, dhe vetëm Ukraina, ajo që mund të vendosë kur janë të volitshme parakushtet për bisedime. Detyra jonë është t’i mbështesim.” – tha Stoltenberg.
Duke folur të martën, shefi i shtabit të Stoltenberg, Stian Jenssen, tha në një konferencë se një zgjidhje për konfliktin ‘mund të jetë që Ukraina të heqë dorë nga territori dhe të marrë anëtarësimin në NATO në këmbim’. Jenssen pohoi se ideja po diskutohej në mënyrë aktive brenda NATO-s.
Vërejtjet nxitën një vale kritikash në Kiev, ku presidenti ukrainas Vladimir Zelensky i ka shpallur të jashtëligjshme bisedimet me Kremlinin për sa kohë që lideri rus Vladimir Putin mbetet në pushtet dhe ka premtuar të rimarrë të gjithë territorin e mëparshëm të Ukrainës, përfshirë Krimenë.
NATO lëshoi një deklaratë brenda disa orësh duke këmbëngulur se politika e saj në Ukrainë nuk kishte ndryshuar, ndërsa Jenssen kërkoi falje dhe tha se komentet e tij ishin një ‘gabim’.
