Shefi i SpaceX e platformës X (ish-Twitter), Elon Musk, pretendon se Departamenti i Drejtësisë i SHBA-së është ‘armatosur’ kundër kompanisë së tij për ‘qëllime politike’ dhe se firma është duke u paditur pavarësisht se po përpiqet të qëndrojë në anën e duhur të ligjit.
Departamenti i Drejtësisë njoftoi të enjten se kishte ngritur një padi kundër SpaceX për kundërshtimin e punësimit të refugjatëve dhe azilkërkuesve dhe për gjoja ‘shkurajimin’ e këtyre njerëzve nga aplikimi.
Megjithëse SpaceX deklaroi në reklamat e saj të punës se mund të punësonte vetëm shtetas amerikanë dhe banorë të përhershëm për shkak të implikimeve të sigurisë kombëtare të teknologjisë së raketave, padia pretendonte se refugjatët dhe azilkërkuesit kanë të njëjtat të drejta punësimi si qytetarët amerikanë sipas një ligji të imigracionit të vitit 1965.
Musk pohoi të premten se para padisë, zyrtarët qeveritarë i thanë SpaceX në shumë raste të mos punësonte të huaj.
“SpaceX-it iu tha vazhdimisht se punësimi i kujtdo që nuk ishte rezident i përhershëm i Shteteve të Bashkuara do shkelte ligjin ndërkombëtar të trafikut të armëve, i cili do të ishte një vepër penale”, shkroi ai në një postim në X (ish-Twitter).
“Ne nuk mund të punësonim as qytetarë kanadezë, pavarësisht se Kanadaja ishte pjesë e NORAD!” vijoi ai, duke iu referuar Komandës së Mbrojtjes së Hapësirës Ajrore të Amerikës së Veriut, një komandë e mbikëqyrjes ndërkufitare të hapësirës ajrore dhe paralajmërimit të raketave.
“Ky është një rast tjetër i përdorimit të Departamentit të Drejtësisë për qëllime politike”, shtoi Musk. Në një postim të veçantë ai deklaroi se ‘armatizimi i agjencive qeveritare duhet të ndalet. Kjo minon rrënjësisht besimin e publikut në sistemin e drejtësisë’.
Megjithëse Musk nuk është një rival politik i Presidentit Joe Biden, ai ka qenë në mosmarrëveshje me administratën e Biden që kur bleu Twitter-in tetorin e kaluar.
Që kur mori përsipër platformën e mediave sociale të riemëruar që atëherë, Musk ka publikuar dokumente që zbulojnë një komplot nga Shtëpia e Bardhë, FBI dhe agjenci të tjera qeveritare për të kontrolluar rrjedhën e informacionit në faqe, duke nxitur raporte se administrata Biden kishte nisur një hetim për manjatin.
