Presidenti rus Putin ka urdhëruar luftëtarët e Wagner të nënshkruajnë një betim për besnikëri ndaj shtetit rus pas një aksidenti vdekjeprurës ajror që besohet se ka vrarë Yevgeny Prigozhin, shefin e grupit mercenar.
Putin nënshkroi dekretin që sjell ndryshimin me efekt të menjëhershëm të premten, pasi Kremlini tha se sugjerimet perëndimore se Prigozhin ishte vrarë me urdhër të tij ishin një ‘gënjeshtër absolute’. Kremlini nuk pranoi të konfirmojë përfundimisht vdekjen e tij, duke përmendur nevojën për të pritur rezultatet e testit.
Autoriteti i aviacionit të Rusisë ka thënë se Prigozhin ishte në bordin e një avioni privat i cili u rrëzua të mërkurën në mbrëmje në veriperëndim të Moskës pa të mbijetuar, saktësisht dy muaj pasi ai udhëhoqi një rebelim të dështuar kundër shefave të ushtrisë.
Putin dërgoi ngushëllimet e tij për familjet e të vrarëve në aksident të enjten dhe foli për Prigozhin në kohën e kaluar.
Ai përmendi ‘informacionet paraprake’ që tregonin se Prigozhin dhe bashkëpunëtorët e tij kryesorë të Wagner ishin vrarë të gjithë dhe, ndërsa lavdëroi Prigozhin, tha se ai kishte bërë gjithashtu disa ‘gabime serioze’.
Prezantimi i një betimi të detyrueshëm nga Putin për punonjësit e Wagner dhe kontraktorët e tjerë privatë ushtarakë ishte një lëvizje e qartë për të vënë grupe të tilla nën kontroll më të rreptë shtetëror.
Dekreti, i publikuar në faqen e internetit të Kremlinit, detyron këdo që kryen punë në emër të ushtrisë ose që mbështet atë që Moska e quan ‘operacioni i saj special ushtarak’ në Ukrainë, të betohen zyrtarisht për besnikëri ndaj Rusisë.
I përshkruar në dekret si një hap për të farkëtuar themelet shpirtërore dhe morale të mbrojtjes së Rusisë, formulimi i betimit përfshin një rresht në të cilin ata që e bëjnë premtojnë të ndjekin me përpikmëri urdhrat e komandantëve dhe drejtuesve të lartë.
Politikanët dhe komentatorët perëndimorë kanë sugjeruar, se Putini urdhëroi të vritej Prigozhin për ta ndëshkuar atë për fillimin e kryengritjes së 23-34 qershorit kundër udhëheqjes së ushtrisë, e cila gjithashtu përfaqësonte sfidën më të madhe ndaj sundimit të Putinit që kur erdhi në pushtet në 1999. .
Inteligjenca ushtarake britanike tha të premten se nuk kishte ende prova përfundimtare se Prigozhin kishte qenë në bord, por se kishte ‘shumë të ngjarë’ që ai të kishte vdekur. Pentagoni ka thënë se vlerësimi i tij fillestar është se Prigozhin u vra.
Gazeta ruse e lajmeve Baza, e cila ka burime të mira në mesin e agjencive të zbatimit të ligjit, ka raportuar se hetuesit po përqendrohen në një teori që një ose dy bomba mund të jenë vendosur në bordin e avionit.
I pyetur për të ardhmen e Grupit Wagner, i cili ka një sërë kontratash fitimprurëse në të gjithë Afrikën dhe një kontigjent në Bjellorusi që trajnon ushtrinë atje, por tani duket pa drejtues, zëdhënësi i Kremlinit Peskov ishte konciz.
“Nuk mund t’ju them asgjë tani, nuk e di”, tha ai.
