Ministri i Mbrojtjes, Niko Peleshi ka përditësuar informacionin mbi situatën e zjarreve në vendin tonë.
Peleshi thotë se të shtata vatrat e zjarrit në zona të ndryshme të vendit janë shuar dhe aktualisht nuk ka asnjë vatër aktive në vend.
Ministri bën me dije se situata në vendgrumbullimin e mbetjeve në Elbasan është në monitorim nga forcat zjarrfikëse të qytetit.
“Të shtata vatrat e zjarrit që ditën e djeshme përfshinë zona të ndryshme të vendit janë shuar dhe aktualisht nuk kemi asnjë vatër aktive në vend, pavarësisht temperaturave të larta.
Në fshatin Krastë, në bashkinë e Krujës, të gjitha vatrat që ishin aktive janë shuar.
Puna intensive dhe angazhimi maksimal bëri të mundur shuarjen përfundimtare të flakëve edhe në vendgrumbullimin e mbetjeve urbane, në Elbasan. Situata po monitorohet nga forcat e zjarrfikëses së bashkisë së këtij qyteti.
Të gjithë strukturat e mbrojtjes civile në nivel vendor dhe qendror mbeten në gatishmëri të plotë”, -shkruan Peleshi.
