Sekretarja amerikane e Tregtisë, Gina Raimondo, e filloi vizitën e saj në Kinë me një takim me ministrin kinez të Tregtisë Wang Wentao të hënën.
Ky është udhëtimi i parë në Kinë nga një shef i tregtisë në detyrë i SHBA-së në shtatë vjet.
Diskutimet midis palëve amerikane dhe kineze pritet të mbulojnë të gjitha çështjet, duke përfshirë përpjekjet për të ulur tensionet midis dy ekonomive më të mëdha të botës.
Raimondo, e cila mbërriti në Pekin të dielën mbrëma, pritet gjithashtu të takohet me kryeministrin kinez Li Qiang dhe zëvendëskryeministrin He Lifeng dhe është planifikuar të vizitojë Shangain të martën dhe të mërkurën, raportoi e përditshmja South China Morning Post, sipas AA.
Në fillim të këtij viti në maj, Raimondo dhe Wentao u takuan për dy ditë në Uashington.
Të dy kishin diskutuar mbi tregtinë, investimet dhe politikat e eksportit gjatë takimit të tyre në margjinat e forumit të Bashkëpunimit Ekonomik Azi-Paqësor në Detroit, Michigan.
Wang dhe Raimondo kishin rënë dakord të “forconin shkëmbimet mbi shqetësimet specifike ekonomike dhe tregtare dhe çështjet në lidhje me bashkëpunimin”, sipas Ministrisë Kineze të Tregtisë.
Raimondo është në mesin e katër zyrtarëve të lartë amerikanë që vizitojnë Kinën që nga qershori.
Sekretari amerikan i Shtetit Antony Blinken, Sekretarja e Thesarit Janet Yellen dhe i dërguari i posaçëm presidencial për klimën John Kerry janë tre zyrtarët e tjerë që vizituan Pekinin dhe zhvilluan takime të nivelit të lartë.
