SHBA njoftoi të martën një paketë të re armësh për Ukrainën me vlerë deri në 250 milionë dollarë, ndërsa forcat e Kievit vazhdojnë të bëjnë një kundërofensivë për të rimarrë territorin e pushtuar nga Rusia.
Kësti i fundit përfshin raketa të mbrojtjes ajrore AIM-9M Sideëinder, më shumë raketa HIMARS me rreze të gjatë veprimi, fishekë artilerie 155 mm dhe 105 mm, pajisje për pastrimin e minave, raketa antitank TOW, sisteme kundër tankeve Javelin, raketa ajër-tokë Hydra-70 dhe më shumë se 3 milionë fishekë të armëve të vogla, tha Pentagoni në një deklaratë.
Ai përfshin gjithashtu automjete të blinduara mjekësore dhe ambulanca Humvee, si dhe municione për pastrimin e pengesave dhe pajisje të tjera të paspecifikuara në terren.
Armët po transferohen në Ukrainë nën atë që njihet si autoriteti i tërheqjes presidenciale, i cili i lejon Presidentit Joe Biden të dërgojë pajisje ushtarake nga stoqet ekzistuese të SHBA në vendet aleate. Paketa e fundit shënon herën e 45-të që Biden përdor autoritetet për të ndihmuar Ukrainën.
Administrata Biden i ka ofruar Ukrainës më shumë se 43 miliardë dollarë ndihmë që nga pushtimi i Rusisë në shkurt 2022.
