Një kilogram kokainë është sekuestruar në Tiranë ndërsa në pranga kanë përfunduar tre të rinj që udhëtonin me makinën ku u gjet lënda narkotike.
Të ndaluarit janë Robert Domi, 30 vjeç, Andrea Dema, 24 vjeç, banues në Shijak e Genis Mustafa, 27 vjeç, banues në Tiranë.
Ata u ndaluan në rrugën ‘Vangjush Furrxhi’ ndërsa dyshohet se furnizonin rrjete shpërndarësish në rrugën ‘Myslym Shyri’, ‘Rrugën e Durrësit’ e në zonën e ‘21 Dhjetorit’.
Njoftimi
“Specialistët e Seksionit të Hetimit të Narkotikëve, në bashkëpunim me Forcën e Posaçme Operacionale të DVP Tiranë, në vijim të punës për goditjen e aktivitetit kriminal në fushën e shpërndarjes së lëndëve narkotike, pas një pune të mirëfilltë hetimore në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, organizuan dhe finalizuan me sukses operacionin policor të koduar “Three stars”.
Në kuadër të këtij operacioni u bë arrestimi në flagrancë i shtetasve:R.D., 30 vjeç dhe A. D., 24 vjeç, banues në Shijak; G. M., 27 vjeç, banues në Tiranë.
Në rrugën “Vangjush Furrxhi”, shërbimet e Policisë kanë lokalizuar automjetin me drejtues shtetasin G. M. dhe pasagjerë shtetasit A. D. dhe R. D. Gjatë kontrollit në automjet është gjetur një pako me lëndë të dyshuar narkotike të llojit kokainë, me peshë 1 kg e 52 gramë.
Nga verifikimet e kryera ka rezultuar se këta shtetas, në bashkëpunim me njëri-tjetrin, siguronin lëndë të dyshuar narkotike të llojit kokainë dhe më pas disa rrjete shpërndarësish, në rrugën “Myslym Shyri”, në Rrugën e Durrësit dhe në zonën e 21-Dhjetorit.
Në cilësinë e provës materiale u sekuestruan 1 kg e 52 gramë lëndë e dyshuar narkotike kokainë, 4 aparate celulare, 1400 euro dhe 78 900 lekë.”
