Kompania japoneze e energjisë Tokyo Electric Power (TEPCO) ka regjistruar për herë të parë gjurmë të tritiumit në oqean pranë vendit të shkarkimit të ujërave të trajtuara të centralit bërthamor në Fukushima, sipas një deklarate.
TEPCO raportoi se përqendrimi i tritiumit – një izotop radioaktiv i hidrogjenit – u zbulua në mostrat e marra më 31 gusht në 11 pika brenda 3 kilometrash nga Stacioni Bërthamor Fukushima Daiichi. Në 200 metra – pika më e afërt nga e cila ujërat e trajtuara lëshohen në oqean – përqendrimi u zbulua të jetë 10 bekerel për litër (bq/l), që është një njësi e përdorur për të matur radioaktivitetin.
Ekspertët japonezë thanë se leximi ishte vetëm pak mbi kufirin e poshtëm të zbulimit prej 8,6 bq/l dhe është rreth 6,000 herë më pak se niveli i lejuar prej 60,000 bq/l, i vendosur nga Komisioni Ndërkombëtar i Japonisë për Mbrojtjen Radiologjike. Nivelet e zbuluara janë gjithashtu 1050 herë më të ulëta se norma e pranueshme për ujin e pijshëm të vendosur nga Organizata Botërore e Shëndetësisë.
Në mostrat e marra nga pika të tjera matëse brenda 10 kilometrash nga vendi i shkarkimit të ujit, nivelet e përqendrimit të tritiumit u gjetën nën kufirin e poshtëm të zbulimit prej 7.6 deri në 7.7 bq/l.
TEPCO vuri në dukje në raportin e tij se leximet mund të ndryshojnë në të ardhmen për shkak të ndryshimit të rrymave. Tokio ka këmbëngulur që gjatë gjithë shkarkimit të ujit në Fukushima, nivelet e tritiumit në ujin e oqeanit nuk do kalojnë 1500 bq/l.
Diku tjetër, Agjencia e Peshkimit e Japonisë si dhe Prefektura e Fukushimës kanë raportuar se testimi i tyre nuk zbuloi një ndryshim të dallueshëm në nivelet e tritiumit në peshk ose në ujë që nga fillimi i lëshimit.
Qeveria japoneze ka mbrojtur në mënyrë të përsëritur lëshimin e ujërave radioaktive të trajtuara nga centrali i shkatërruar në Fukushima dhe është e bindur se nuk do prekë njerëzit apo mjedisin.
Procedura filloi javën e kaluar si pjesë e një plani të miratuar nga OKB. Megjithatë, ajo ka shkaktuar dënimin nga një numër fqinjësh të Japonisë, duke përfshirë Kinën dhe Korenë e Jugut, të cilët e kanë dënuar masën si “të papërgjegjshme” dhe kanë ndaluar prodhimet japoneze të detit nga frika e ndotjes.
Mbikëqyrësi veterinar dhe fitosanitar i Rusisë, Rosselkhoznadzor, tha të enjten se nuk kishte gjetur ndonjë nivel të tepruar të rrezatimit në peshqit e kapur në detet e Lindjes së Largët, duke arritur në përfundimin se lëshimi i ujërave të zeza në Fukushima nuk kishte rrezikuar sigurinë e prodhimeve të detit në rajon.
