Më shumë se 1.4 milionë raste të reja të Covid-19 dhe mbi 1800 vdekje që i atribuohen sëmundjes janë regjistruar në mbarë botën nga 31 korriku deri më 27 gusht, tha të premten Organizata Botërore e Shëndetësisë.
Shifrat përfaqësojnë një rritje prej 38% të numrit të rasteve dhe një rënie prej 50% të numrit të vdekjeve nga periudha e mëparshme 28-ditore, tha OBSH në buletinin e saj javor.
Koreja e Jugut kishte numrin më të madh të rasteve të reja (1,296,710) dhe vdekjeve (596), tha OBSH. Italia kishte pothuajse 27,000 raste të reja, e ndjekur nga Mbretëria e Bashkuar me 26,000.
Rritja më e madhe e rasteve të reja ishte në Mesdheun Lindor (+113%), Paqësorin Perëndimor (+52%) dhe Rajonin Evropian (+39%), ndërsa Afrikë (-76%) dhe Azinë Juglindore (-48%) ) pa një rënie.
OBSH po ia atribuon rritjen e rasteve variantit ‘Eris’ të koronavirusit të ri, i cili tashmë është më i përhapuri, pasi është gjetur në 26% të sekuencave gjatë javës së dytë të gushtit. Varianti ‘Arturo’ u gjet në 22.7% të sekuencave në 109 vende, ndërsa ‘Kraken’ u raportua nga 124 vende, por duket se po tërhiqet.
Sipas OBSH-së, ka pasur më shumë se 770 milionë raste të Covid-19 dhe mbi 6.9 milionë vdekje nga virusi që nga fillimi i pandemisë.
Megjithëse OBSH deklaroi fundin e ‘urgjencës globale shëndetësore’ në maj, organizata u ka kujtuar shteteve anëtare që ‘të mirëmbajnë dhe jo të çmontojnë, infrastrukturat e tyre anti-Covid-19’, duke i nxitur ata të mbajnë në fuqi sistemet ‘e hershme të paralajmërimit, mbikëqyrjes dhe raportimit, gjurmimi i varianteve, ndihmës së hershme klinike dhe vaksinimit për grupet me rrezik të lartë’.
Buletini i së premtes ishte përditësimi i fundit javor nga OBSH, i cili synon të kalojë nga reagimi emergjent në ‘parandalimin, kontrollin dhe menaxhimin’ afatgjatë të Covid-19. Përditësimet do jenë mujore tani e tutje, ndërsa tjetra do jetë në fund të shtatorit.
