Ben Emmerson, avokati britanik i ish-kryeparlamentarit Kadri Veseli pothuajse ka arritur ta vë në dyshim komplet një raport të organizatës “Human Rights Watch” për “abuzimet e UÇK-së”, duke e bërë një përfaqësues të kësaj organizate – i cili u paraqit si dëshmitar në Gjykatën Speciale në Hagë – që të pranojë se i kishin marrë për bazë pretendimet e palës serbe, përcjell Gazeta Express.
“Duhej të ishte shkruar ndryshe”, ishin fjalët e shpeshta të dëshmitarit Frederick Abrahams, të cilat i përsëriti disa herë të mërkurën.
Raporti i HRW jep gjykimin për se UÇK-ja kishte shkelur rregullat e luftës.
Frederick Abrahams, një përfaqësues i organizatës ndërkombëtare “Human Rights Watch” u paraqit si dëshmitar në gjykimin ndaj ish-udhëheqësve politikë e ushtarakë të Ushtrisë Çlirimtare të Kosovës në Gjykatën Speciale në Hagë. Në cilësinë e dëshmitarit të 22-të në këtë rast gjyqësor, atij dje iu desh t’i përgjigjej pyetjeve të Ben Emmerson, avokatit britanik të Kadri Veselit.
Emmerson e bëri Abrahamsin të pranojë se së paku në një rast në të cilin HRW e implikon UÇK-në, pretendimet i kishin marrë nga pala serbe.
Ballafaqimi i Emmerson me Abrahams në Gjykatë
Të mërkurën, seanca gjyqësore nisi me pyetjet e Mbrojtjes së Veselit dhe përgjigjet e Abrahams.
Zyrtari i HRW tha se do t’i përpilonte ndryshe fjalët në një raport ku akuzohej UÇK-ja për disa trupa të pajetë, të gjetur në Liqenin e Radoniqit në Gjakovë në shtator të vitit 1998.
Avokati Ben Emmerson nisi ta lexonte një pjesë të një raporti të HRW, ku ishte shkruar se si komandanti i rajonit të Dukagjinit duhet të kishte ditur, siç shkruhej në raport, “masakrën më të madhe që e ka kryer UÇK-ja më 1998”, ku sipas organizatës, ishin vrarë 30-40 persona.
Organizata këtu ka cenuar atë që ajo e dënon, theksoi Emmerson, duke shtuar se HRW e ka shpallur fajtorin pa hetime.
Avokati lexoi gjithashtu një paragraf ku thuhej se “komandantët e zonave kryenin krime, është e qartë si në vrasjen e shtatorit pranë Gllogjanit, komandantët e zonave duhet të kishin ditur, në mos të kishin urdhëruar drejtpërdrejtë vrasjet”. Këtu, Emmerson tha se 9 prej viktimave sa kishin qenë gjallë, ishin nën kujdesin e serbëve.
“Duke ditur ato që dimë sot, këtë fjali do ta përpiloja ndryshe”, tha dëshmitari Frederick Abdrahams.
Duke kujtuar se një gjykim për këtë rast kishte përfunduar dhe se i akuzuari ishte shpallur i pafajshëm, Emmerson tha se kjo vërteton se nuk kishte “organizatë të përbashkët kriminale” dhe se ai krim nuk kishte lidhje me asnjë prej komandantëve.
“E pranoj gjithsesi se formulimi duhet të ishte bërë ndryshe”, tha Abrahams, ndërsa avokati Emmerson shpejtoi të theksonte se kjo çështje shkon përtej formulimit të fjalive, sepse vrasjet janë përshkruar si të kryera nga forcat e UÇK-së.
Dëshmitari sërish tha se “duhej të ishte shkruar ndryshe”, fjalë të cilat i përsëriti disa herë, për të pohuar më pas se pretendimet i kishin marrë nga pala serbe.
Avokati sqaroi se viktimat kishin vdekur në vende e kohë të ndryshme dhe se trupat e tyre ishin hedhur në të njëjtin vend, ndërsa dëshmitari shqiptonte sërish fjalët e tij të shpeshta: “Duhej të ishte shkruar ndryshe”.
Organizata HRW nuk kishte bërë hetim të hollësishëm dhe nuk kishte shkuar ndonjëherë në vendin e krimit, dhe Abrahams e pranoi këtë.
Më tej, përfaqësuesi i HRW ndalej te disa pjesë të tjera. Thoshte se i qëndron prapa deklaratës së tij se komandantët e zonave po të donin mund të kishin parandaluar veprimet kriminale.
Në anën tjetër, lidhur me rastin e “Kleçkës”, dëshmitari u pajtua se ekzistonte një fushatë nga serbët për t’i transporuar trupat nga Kosova në Serbi për t’u shfajësuar duke fshirë gjurmët e krimeve. Por tha edhe se kishte dëgjuar se Serbia pretendonte se kishte zbuluar në një varr krime të kryera nga UÇK-ja dhe se ishin zbuluar trupa në Kleçkë.
Çfarë thuhet në raportin e HRW për atë periudhë?
Në një raport të titulluar “Shkeljet e së Drejtës Humanitare në Kosovë”, organizata ndërkombëtare e të drejtave të njeriut shkruan për “shkeljet e rregullave të luftës” dhe “abuzimet nga UÇK-ja”.
“Përkundër detyrimeve”, HRW konstaton që në krye se “UÇK-ja ka kryer shkelje të së drejtës ndërkombëtare humanitare, duke përfshirë marrjen e pengjeve”.
Në disa raste, në raport jepet gjykimi për UÇK-në. Për shembull, për rastin e Kleçkës, thuhet se ishte “abuzimi më i rëndë i UÇK-së”. Pak më tutje, në të njëjtin paragraf, theksohet gjithsesi rëndësia e një “hetimi të paanshëm”.
“Më 9 shtator, policia njoftoi se kishte gjetur një numër të trupave të personave të vrarë nga UÇK-ja afër Gllogjanit. Deri më 16 shtator, autoritetet kishin mbledhur tridhjetë e katër trupa, njëmbëdhjetë prej të cilëve u identifikuan, duke përfshirë disa shqiptarë etnikë. Para kësaj, abuzimi më i rëndë i UÇK-së përfshinte ekzekutimin e raportuar të njëzet e dy civilëve serbë në fshatin Kleçkë, ku policia pretendoi se kishte zbuluar mbetje njerëzore dhe një furrë të përdorur për djegien e trupave. Mënyra në të cilën u ngritën akuzat, megjithatë, ngre pyetje serioze dhe nënvizon rëndësinë e një hetimi nga një ekip i paanshëm hetimor mjeko-ligjor, i cili duhet të ekzaminojë Kleçkën, si dhe zonat e tjera ku janë raportuar ekzekutime”, thuhet në raport.
“Kryengritja shqiptare, e njohur si Ushtria Çlirimtare e Kosovës (KLA, në shqip, UÇK), gjithashtu ka shkelur ligjet e luftës me veprime të tilla si marrja e pengjeve civile dhe me ekzekutime”, thuhet ndër tjerash në raport.
“Human Rights Watch” gjithashtu thotë në atë raport se “UÇK-ja gjithashtu ka bërë shkelje të rënda të së drejtës humanitare ndërkombëtare, duke përfshirë marrjen e pengjeve dhe ekzekutimet pa gjyq”.
Fred Abrahams po vazhdon dëshminë e tij në gjyq edhe sot. Ai është mbikëqyrës i trajnimit kërkimor të “Human Rights Watch” dhe mbikëqyr punën e divizioneve të Krizave dhe Konflikteve, Armëve dhe Teknologjisë dhe Laboratorit të Hetimeve Dixhitale.
Ai ndihmon në koordinimin e reagimit të organizatës ndaj krizave të mëdha dhe përveç Kosovës, ka punuar edhe në disa vende si Shqipëria, Bangladeshi, Iraku, Libani, Libia, Sri Lanka, Siria dhe Izraeli, Gaza dhe Bregu Perëndimor. Flet gjermanisht dhe shqip.
