Udhëheqësit e grupit G20 të ekonomive të përparuara kanë rënë dakord t’i japin Bashkimit Afrikan anëtarësim të përhershëm në organizatë, sipas raporteve të shumta të mediave përpara samitit të kësaj jave në Nju Delhi.
Blloku i 55 vendeve afrikane, i cili tani për tani klasifikohet si një ‘organizatë ndërkombëtare e ftuar’ nga G20, do kishte të njëjtin status si Bashkimi Evropian brenda grupit.
Kryeministri indian Narendra Modi, vendi i të cilit mban presidencën e rradhës të G20, thuhet se u kërkoi udhëheqësve të tjerë të pranojnë Bashkimin Afrikan në grup në një letër në qershor.
“Ky do jetë një hap i duhur drejt një arkitekture dhe qeverisjeje globale të drejtë, më gjithëpërfshirëse dhe përfaqësuese,” citoi media të thoshte dokumenti.
Afrika e Jugut është anëtarja e vetme e përhershme e G20 që përfaqëson kontinentin. Egjipti dhe Mauritius janë thjesht ‘të ftuar’.
Anëtarësimi i ardhshëm i Bashkimit Afrikan u konfirmua nga gazeta The Times of India dhe agjencia e lajmeve Bloomberg. Bloomberg tha se SHBA dhe aleatët e saj evropianë synojnë të përdorin samitin e liderëve të G20 në Indi, i cili është planifikuar për këtë fundjavë, për të tërhequr kombet që kanë marrëdhënie të mira me Moskën dhe Pekinin.
Presidenti rus Vladimir Putin dhe ai i Kinës Xi Jinping nuk do marrin pjesë personalisht. Evropianët, në veçanti, e shohin mbështetjen e tyre për ofertën e Bashkimit Afrikan si një mundësi për të shtuar ndikimin mes kombeve të kontinentit, shpjegoi gazeta.
