Filmi i regjisorit të ri shqiptar Erenik Beqiri ‘Një udhëtim i shkurtër”, arriti të fitojë mes 12 produksioneve në kategorinë ‘Orizzonti’ (për filmat me metrazh të shkurtër) në këtë edicion të 80-të të Bienales të Festivalit të Venecias.
Regjistrimet për realizimin e filmit kanë zgjatur 3 vjet dhe ka si subjekt një histori shqiptare ku tregohen sakrificat e mëdha që bëhen nga shqiptarët në këmbim të një shtetësie të huaj.
Filmi “Udhëtim i Shkurtër” pati mbështetjen e Ambasadës Franceze, dhe u xhirua po në Francë.
Aktorët protagonistë pjesëmarrës janë Luana Bajrami, Tristan Halilaj, Arben Bajraktari dhe Walid Afkir.
Kush është Erenik Beqiri
Ereniku studioi në Akademinë e Arteve të Tiranës, ku u diplomua për regji filmi.
Filmi i tij i diplomimit ishte Seed Money, një film i shkurtër i shkruar nga Jim Uhls (Fight Club).
Ai mori pjesë në kampusin e talenteve të Sarajevës si skenarist, ku zhvilloi filmin e shkurtër Reverse i cili u prodhua një vit më vonë nga Sarajevo Film City.
Reverse mori çmimet për filmin më të mirë në ISFF Drama dhe çmimin Cinematic Achievement në ISFF Selanik. Në vitin 2013, ai shkroi dhe drejtoi filmin e shkurtër Alphonso i cili u shfaq në festivale të tilla si Festivali Ndërkombëtar i Filmit në Vancouver dhe ISFF Bruksel, ndër të tjera.
Filmi i tij tjetër i shkurtër Bon Appétit u nominua për Méliès D’Argent në Festivalin Ndërkombëtar të Filmit Fantastik në Bruksel, i përzgjedhur në aapsalu, Dokufest, Lund dhe shumë të tjerë.
Filmi i tjetër i shkurtër, The Van, ishte në konkurim zyrtar në Festivalin e Filmit në Kanë dhe shumë festivale të tjera si Festivali Ndërkombëtar i Filmit në Melburn, Festivali i Filmit në Sarajevë etj.
Filmat e tij portretizojnë betejat e brendshme të personazheve përballë hapësirës socio-politike ku ata banojnë, duke çuar në fund të fundit në vendime shqetësuese që i përcaktojnë si portrete komike, tragjike apo groteske të shoqërisë. Ereniku aktualisht jeton dhe punon në Tiranë, Shqipëri.
