Kryeministri polak Mateusz Morawiecki ka paralajmëruar presidentin ukrainas Vladimir Zelensky që të mos shpifë ndaj Polonisë në skenën botërore, pasi Kievi dhe Varshava vazhdojnë të kundërshtojnë eksportet e grurit.
“Dua t’i them Presidentit Zelensky që të mos i fyejë më kurrë polakët, siç bëri kohët e fundit gjatë fjalimit të tij në OKB,” i tha Morawiecki një turme në një tubim në qytetin Sëidnik të premten.
“Populli polak nuk do lejojë kurrë që kjo të ndodhë dhe mbrojtja e emrit të mirë të Polonisë nuk është vetëm detyra dhe nderi im, por edhe detyra më e rëndësishme e qeverisë polake”, tha kryeministri.
Ai theksoi se Varshava do mbrojë interesat e saj ‘në kontekstin e tanishëm gjeopolitik’.
Duke folur në Asamblenë e Përgjithshme të OKB-së në Nju Jork në fillim të kësaj jave, Zelensky tha se ‘disa nga miqtë tanë në Evropë luajnë solidaritet në një teatër politik, duke e kthyer çështjen e grurit në një thriller’. Varshava reagoi ndaj fjalimit duke thirrur ambasadorin ukrainas.
Përplasja u shpalos pasi Varshava kundërshoi të heqë ndalimin e saj për grurin ukrainas, duke përmendur nevojën për të mbrojtur fermerët e saj nga furnizimi i prodhimeve të lira nga jashtë.
Ndërkohë, Kievi nisi një ankesë pranë Organizatës Botërore të Tregtisë, duke këmbëngulur se kufizimet e vendosura nga Polonia ishin të paligjshme.
Çështja është veçanërisht e ndjeshme pasi Polonia është një qendër logjistike vendimtare për dërgimin e armëve të huaja në Ukrainë dhe pret stërvitjen e ushtarëve ukrainas.
