Ish-zonja e parë e Shteteve të Bashkuara, Melania Trump, besohet se ka rinegociuar në heshtje marrëveshjen e saj paramartesore me bashkëshortin e saj Donald Trump, ndërsa çështjet ligjore të ish-presidentit vazhdojnë të shtohen, thuhet në një raport të mediave amerikane.
Melania Trump, e cila ka mbajtur një profil të ulët që kur Joe Biden pasoi burrin e saj si president i SHBA-së në janar 2021, ndryshoi marrëveshjen e saj martesore për të siguruar të ardhmen e saj financiare, si dhe atë të djalit të tyre 17-vjeçar Barron Trump, raportoi New York Post në fillim të kësaj jave duke cituar burime anonime.
Raporti vjen vetëm disa ditë pasi një gjykatës në Nju Jork vendosi se Donald Trump kishte kryer një mashtrim të gjerë dhe të zgjatur të pasurive të paluajtshme – duke përfshirë edhe kohën kur ishte president – duke fryrë artificialisht vlerën e zotërimeve të tij me miliarda dollarë.
“Kjo është të paktën hera e tretë që Melania ka rinegociuar kushtet e marrëveshjes së saj martesore”, tha një burim për New York Post.
Raporti shton se ekipi ligjor i Melania Trump filloi bisedimet me përfaqësuesit e Donald Trump vitin e kaluar, rreth kohës kur ish-presidenti filloi të sinjalizonte se po përgatitej të fillonte një përpjekje për të rifituar Shtëpinë e Bardhë në zgjedhjet presidenciale të 2024-ës.
Donald Trump më pas është përballur me një sërë çështjesh ligjore, duke përfshirë katër padi penale dhe rrezikon burgim të mundshëm. Ai mohon të gjitha pretendimet e akuzat ndaj tij.
“Nuk është se ajo e kërcënoi se do e linte atë”, tha burimi i New York Post.
“Unë e di se ajo donte që asaj t’i siguroheshin më shumë para dhe gjithashtu, nga sa kuptoj unë, ka një shumë të caktuar minimalisht që Barron supozohet të marrë.”
Përveç rastit të mashtrimit të pasurive të paluajtshme në Nju Jork, Donald Trump përballet gjithashtu me një mori çështjesh ligjore.
Ai dyshohet se ka bërë pagesa të paligjshme të ‘parave të heshtura’ për një aktore të filmave për të rritur dhe se ka keqtrajtuar me dashje dokumente të klasifikuara qeveritare në pronën e tij në Florida. Ai po përballet gjithashtu me akuza në lidhje me ndërhyrjen në zgjedhje në shtetin e Xhorxhias.
Ai ka mohuar të gjitha akuzat për paligjshmëri dhe tha këtë javë se rasti i pasurive të paluajtshme në Nju Jork është ‘jo-amerikan’ dhe një ‘mashtrim’ i krijuar nga kundërshtarët e tij politikë për të ndikuar në fushatën e tij për t’u kthyer në Shtëpinë e Bardhë.
Të premten, një aleat i Donald Trump, vëzhguesi republikan i sondazheve Scott Hall, u deklarua fajtor për komplot për të ndërhyrë në procesin e zgjedhjeve presidenciale të vitit 2020 në Xhorxhia. Ai pritet të dëshmojë kundër Trump në procedurat e ardhshme gjyqësore.
