Gjermania dhe Kina janë të prirura të forcojnë më tej bashkëpunimin e tyre për çështjet financiare dhe ekonomike, tha të dielën ministri gjerman i Financave, Christian Lindner.
Duke folur në dialogun e tretë financiar gjermano-kinez në Frankfurt, ku mori pjesë edhe zëvendëskryeministri kinez He Lifeng, Lindner tha se të dyja palët duan të krijojnë një mjedis tregu të drejtë dhe jo-diskriminues dhe të forcojnë sigurinë e zinxhirëve të furnizimit global.
Lindner vuri në dukje diskutimet ‘shumë konstruktive, shumë të hapura’. Të dyja palët janë të vendosura të zgjerojnë mundësitë e qasjes në treg dhe t’i ‘hapin ato në kuptimin e një fushe loje të barabartë’, tha ai.
“Kjo krijon mundësi nga të dyja palët për tregti dhe investime të përgjegjshme,” shtoi Lindner.
Berlini kërkon qasje më të lehtë në treg për bankat gjermane në Kinë. Kina ende duhet të punojë për këtë çështje, citoi Agjencia Gjermane e Shtypit DPA qarqe të Ministrisë së Financave të thonë përpara takimit.
Qeveria federale dëshiron të sigurojë që më shumë institucione financiare gjermane të marrin licenca në Kinë. Përveç kësaj, Frankfurti duhet të forcohet si një vend bankar dhe një qendër e BE-së për bankat kineze.
Gjatë dialogut financiar u ra dakord edhe për një deklaratë të përbashkët gjithëpërfshirëse me qëndrime të përbashkëta.
Në të, të dyja palët thanë se do ‘angazhoheshin qartë për një ekonomi të hapur globale dhe multilateralizëm’ brenda kornizës së OKB-së, Fondit Monetar Ndërkombëtar, Bankës Botërore, Organizatës Botërore të Tregtisë dhe G-20, tha Lindner.
