Autoritetet në Singapor kanë sekuestruar ose ngrirë asete me vlerë më shumë se 2 miliardë dollarë amerikanë në një hetim të madh për pastrim parash, tha një zyrtar i lartë të martën, ndërsa sinjalizoi se qeveria mund të shtrëngojë rregullat e emigracionit për të frenuar flukset e paligjshme.
Hetimi është në vijim dhe autoritetet po marrin në pyetje si shtetasit e Singaporit, ashtu edhe të huajt, tha në Parlament Josephine Teo, ministrja e Dytë për Punët e Brendshme.
Qyteti-shtet do rishikojë se si të forcojë kontrollet e tij të verifikimit të emigracionit, megjithëse ‘asnjë proces shqyrtimi nuk është i pagabueshëm’, tha Teo, e cila gjithashtu drejton Ministrinë e Komunikimeve dhe Informacionit.
“Singapori e merr seriozisht pastrimin e parave,” tha ajo.
“Ne nuk mbyllim sytë para asnjë rreziku, pasi të jemi të vetëdijshëm për to. Kjo nuk është hera e parë që ne marrim masa të rënda përmbarimore kundër veprave penale të pastrimit të parave. As nuk do të jetë e fundit.”
Singapori ka kapitalizuar prej kohësh reputacionin e tij për qeverisje të pastër dhe zero tolerancë ndaj krimit për të tërhequr investime të huaja dhe të pasurit anembanë botës. Kjo është vënë në pikëpyetje pasi autoritetet konfiskuan asete dhe arrestuan 10 të huaj – të gjithë me origjinë nga Kina – për falsifikim dhe pastrim të të ardhurave nga mashtrimet dhe lojërat e fatit të paligjshëm në internet.
Vendi po punon me homologët ndërkombëtarë dhe rregullatorët vendas do ndërmarrin veprime kundër atyre që kanë dështuar në punën e tyre, tha Teo.
Rasti, i cili shpërtheu në opinionin publik në mes të gushtit, po hedh dritë mbi flukset e fondeve nga jashtë dhe nëse sektori financiar prej 2 trilion dollarësh që drejton ekonominë e qytetit-shtetit ka bërë mjaftueshëm për të bllokuar transaksionet e dyshimta.
Singapori ka parë një fluks aziatikësh të pasur, përfshirë ata nga Kina, që kërkojnë investime të sigurta mes goditjeve në kontinent dhe kufizimeve pandemike.
Ligjvënësit kishin paraqitur më parë dhjetëra pyetje për t’u përgjigjur nga qeveria, duke përfshirë nevojën për të shtrënguar rregullat ekzistuese të pastrimit të parave, hapa të mëtejshëm për të parandaluar krimet ndërkufitare dhe kontrollet e emigracionit.
“Shumica e njerëzve nuk janë pastrues parash apo kriminelë të paligjshëm,” tha Teo.
“Nëse rregullat janë shumë të shtrënguara, atëherë është shumica dërrmuese e aplikantëve të pafajshëm ata që do penalizohen në mënyrë të panevojshme.”
Të paktën 240 individë u dënuan për vepra penale të pastrimit të parave nga viti 2020 deri në vitin 2022, ndërsa policia sekuestroi asete me vlerë më shumë se 1.2 miliardë dollarë, tha ajo.
Flukset hyrëse të pasurisë ndërkufitare në Singapor arritën në 1.5 trilion dollarë vitin e kaluar, sipas një vlerësimi nga Boston Consulting Group. Kjo e bën vendin qendrën e tretë më të madhe financiare në botë pas Zvicrës dhe Hong Kongut, ku të pasurit çojnë asetet e tyre.
Autoritetet thanë muajin e kaluar se operacionet shtesë çuan në bllokimin e llogarive bankare me një vlerë prej më shumë se 1.13 miliardë dollarë dhe kriptovalutave me vlerë 38 milion dollarë. Policia ka lëshuar gjithashtu urdhra për të parandaluar shitjen e më shumë se 110 pronave dhe 62 automjeteve me vlerë mbi 1.24 miliardë dollarë.
Bankat në qytetin-shtet e pasur po rrisin kontrollin e disa klientëve të lindur në Kinë me shtetësi të tjera.
Disa huadhënës kanë rishikuar hapjet dhe transaksionet e reja të llogarive me klientët me origjinë kineze që mbajnë pasaporta të lidhura me investimet, raportoi Bloomberg.
Të paktën një bankë ndërkombëtare po mbyll disa llogari të klientëve me nënshtetësi nga vende si Kamboxhia, Qiproja, Turqia dhe Vanuatu.
Autoritetet po hetojnë gjithashtu rolin që disa të ashtuquajtura zyra familjare mund të kenë luajtur në veprimtarinë e pastrimit.
Autoritetet zbuluan se një ose më shumë nga të akuzuarit në çështjen që përfshin më shumë se 2 miliardë dollarë amerikanë asete, mund të kenë qenë të lidhur me zyrat e një familjeje të vetme që iu dhanë stimuj tatimorë, tha ministri i Shtetit Alvin Tan.
Singapori ka parë një rritje zyrash familjare – të ngritura nga tejet të pasurit për të administruar punët dhe investimet e tyre. Numri i zyrave të familjeve atje u rrit në 1,100 deri në fund të vitit të kaluar, krahasuar me vetëm 400 në fund të 2020.
VINI RE: Ky material është pronësi intelektuale e Bangkokpost
Përgatiti për Hashtag.al, Klodian Manjani
