Qeveria amerikane ka vendosur kufizime të reja tregtare ndaj 42 kompanive kineze, të cilat i akuzoi për sigurimin e materialeve kryesore, të tilla si qarqet e integruara të përdorura në sistemet e drejtimit të raketave, për industrinë ruse të mbrojtjes në mes të krizës në Ukrainë.
Departamenti Amerikan i Tregtisë njoftoi zgjerimin e fundit të listës së tij të kontrollit të eksporteve të premten, duke shtuar dhjetëra entitete kineze dhe nga një nga Estonia, Finlanda, Gjermania, India, Turqia, Britania dhe Emiratet e Bashkuara Arabe.
Eksportuesit amerikanë kërkojnë licenca të veçanta, të cilat janë të vështira për t’u marrë, për të dërguar mallra te klientët në listën e kontrollit të eksportit.
“Ne nuk do ngurrojmë të veprojmë kundër palëve, kudo që ndodhen, që lehtësojnë shitjen e artikujve me origjinë nga SHBA tek ushtria ruse për luftën e saj kundër Ukrainës”, tha në një deklaratë zyrtari i Departamentit të Tregtisë, Alan Estevez.
Lista e kontrollit të eksportit është pjesë e përpjekjes së Uashingtonit për të ndaluar kalimin e teknologjisë së përftuar nga SHBA tek kontraktorët ushtarakë dhe të mbrojtjes ruse. Qarqet mikroelektronike që ndihmojnë në drejtimin e raketave dhe dronëve drejt objektivave të tyre janë ndër shqetësimet kryesore.
