Ekonomia globale do binte në recesion me çmimet e naftës që do rriteshin në qiell nëse Irani do përfshihej në konfliktin Izrael-Palestinë, raportoi Bloomberg këtë javë.
Sipas Bloomberg Economics, analistët po e shohin ndikimin në rritjen globale dhe inflacionin nën tre skenarë të mundshëm: me armiqësi të kufizuara kryesisht në Izrael dhe në territoret palestineze; me përhapjen e konfliktit në Liban dhe Siri; dhe me një konfrontim të drejtpërdrejtë midis Izraelit dhe Iranit.
Ndërsa të tre skenarët ka të ngjarë të shkaktojnë një rritje të çmimeve të naftës, inflacion më të lartë dhe rritje më të ngadaltë ekonomike globale, një luftë e plotë midis Iranit dhe Izraelit do shkaktonte dëmin më të madh, thonë analistët.
“Sa më gjerë të përhapet konflikti, aq më shumë ndikimi i tij bëhet global dhe jo rajonal. Konflikti në Lindjen e Mesme mund të dërgojë dridhje në mbarë botën, sepse rajoni është një furnizues vendimtar i energjisë dhe një kalim kyç i transportit detar,” shkruan ata.
Në këtë rast, çmimet e naftës mund të rriten në 150 dollarë për fuçi. Inflacioni global ka të ngjarë të rritet në 6.7% nga parashikimi aktual i FMN 2024 prej 5.8%. Rritja globale ka të ngjarë të tkurret me 1% nga parashikimet e tanishme për vitin e ardhshëm, në 1.7%. Kjo do ishte shifra më e keqe që nga viti 1982 dhe, në terma monetarë, do t’i kushtonte ekonomisë globale afërsisht 1 trilion dollarë.
“Kapaciteti i rezervuar i prodhimit në Arabinë Saudite dhe Emirateve të Bashkuara Arabe mund të mos e shpëtojë gjendjen nëse Irani vendos të mbyllë ngushticën e Hormuzit, përmes së cilës kalon një e pesta e furnizimeve ditore të naftës në botë. Do kishte gjithashtu një ndryshim më të skajshëm të rrezikut në tregjet financiare”, paralajmërojnë analistët.
Efektet do ndiheshin shpejt, thonë analistët, sepse shumë vende janë ende duke luftuar me inflacionin e shkaktuar nga sanksionet e Perëndimit lidhur me Ukrainën ndaj Rusisë, të cilat kanë riorientuar tregtinë globale, duke përfshirë rrjedhjet e naftës dhe gazit. Ata paralajmërojnë se një luftë tjetër në një rajon që prodhon energji mund ta shtyjë ekonominë globale në një recesion.
Megjithatë, Bloomberg vëren se një konflikt i drejtpërdrejtë midis Iranit dhe Izraelit është ende ‘një skenar me mundësi të ulët’.
Armiqësitë e këtij muaji midis grupit militant palestinez Hamas, i cili kontrollon Gazën, dhe Forcave të Mbrojtjes të Izraelit, kanë shkaktuar tashmë një rritje të çmimeve globale të naftës. Standardet ndërkombëtare të së ardhmes së naftës Brent për dorëzimin e dhjetorit u mbyllën me 90.8 dollarë për fuçi të premten, nga afërsisht 84 dollarë për fuçi një javë më parë.
