Izraeli vijoi fushatën e tij ushtarake në Gaza të shtunën, duke thënë se kishte vrarë një komandant që ishte i përfshirë në sulmet e Hamasit të javës së kaluar, ndërsa qindra mijëra palestinezë në enklavë po përgatiten për një pushtim tokësor të pritshëm izraelit.
Shefi i sigurisë kombëtare të Izraelit, Tzachi Hanegbi, në komentet për gazetarët izraelitë, sugjeroi se ofensiva ishte e sigurt, duke thënë se Izraeli nuk mund ta pranonte më Hamasin si një ‘entitet sovran në Rripin e Gazës’.
“Fitorja e plotë do jetë i vetmi rezultat i mundshëm i kësaj beteje,” tha ai të shtunën.
“Ne jo vetëm që do i shkatërrojmë aftësitë ushtarake dhe qeveritare të Hamasit, por do sigurojmë që ata të mos jenë në gjendje të ringjallen më pas.”
Ushtria izraelite po përgatit një ‘gamë të gjerë planesh operative sulmuese’ për Gazën, duke përfshirë sulmet nga toka, deti dhe ajri, tha qeveria izraelite në një deklaratë të shtunën. Dhe kryeministri izraelit Benjamin Netanyahu, i cili u takua me ushtarët në kufirin e Gazës, tha të shtunën në një postim në Facebook se forcat izraelite ishin ‘të gjitha gati’.
Hanegbi tha se ai kishte ‘bërë gabim’ duke mos vlerësuar me saktësi dëshirën e Hamasit për t’u përballur me Izraelin pas sulmit të Hamasit të shtunën e kaluar që vrau më shumë se 1,300 civilë dhe ushtarë izraelitë.
Ai nuk adresoi drejtpërdrejt mundësinë e pushtimit tokësor, edhe pse Izraeli ka grumbulluar batalione speciale, tanke dhe pajisje të tjera luftarake pranë gardhit pengues që ndan Izraelin nga Rripi i Gazës.
Hanegbi tha se ai ishte në dijeni të 150 deri në 200 pengjeve, përfshirë izraelitë dhe shtetas të huaj, të kapur nga Hamasi dhe të mbajtur në Rripin e Gazës, dhe se Izraeli nuk po priste fundin e luftës për të zgjidhur çështjen e lirimit të tyre. Ai tha se ishte e pamundur që ‘Izraeli të zhvillonte negociata me një armik që ne jemi zotuar ta fshijmë nga faqja e dheut’.
Presidenti Biden përsëriti mbështetjen ushtarake të Shteteve të Bashkuara për Izraelin në një telefonatë me Netanyahun të shtunën, sipas një pohimi të Shtëpisë së Bardhë.
“Presidenti Biden diskutoi me kryeministrin Netanyahu bashkërendimin e SHBA-së me Kombet e Bashkuara, Egjiptin, Jordaninë, Izraelin dhe të tjerët në rajon për të siguruar që civilët e pafajshëm të kenë qasje te uji, ushqimi kujdesi mjekësor”, thuhet në raport.
“Presidenti Biden konfirmoi mbështetjen e tij për të gjitha përpjekjet për të mbrojtur civilët.”
Biden u bëri thirrje të gjitha vendeve që të dënojnë Hamasin ‘si një organizatë terroriste që nuk përfaqëson aspiratat e popullit palestinez’.
Pranë kufirit të Gazës, ku militantët e Hamasit vranë disa familje në shtëpitë e tyre më 7 tetor, një grup ushtarësh izraelitë me kostume të bardha mbushën një kamion me trupa të shtunën. Ishte kamioni i dytë që kishin mbushur atë ditë, me trupat e luftëtarëve palestinezë.
Ushtarët e tjerë aty pranë festuan me zhurmën e plumbave të mortajave. Disa po shkruanin mesazhe në predha tankesh në kujtim të ushtarëve që ishin vrarë.
Ushtarët në zonë thanë se po përgatiteshin për pushtimin tokësor të Izraelit në Gaza, por thanë se nuk e dinin se kur do fillonte. Një ushtar izraelit nga Tel Avivi, i cili kërkoi vetëm të identifikohej me emrin e tij të parë, Dan, sepse nuk ishte i autorizuar të fliste me gazetarët, tha: “Nuk ka asnjë mënyrë për të ditur se kur do nisë, jemi gati. Ne nuk kemi zgjedhje tjetër.”
Kërcënimi i një pushtimi tokësor erdhi ndërsa grupet e ndihmës, diplomatët dhe të tjerët u përpoqën të lehtësonin një krizë humanitare që përshkallëzohej shpejt në Gaza. Këto përpjekje janë përqendruar në përpjekjen për të bindur Izraelin që të anulojë një urdhër evakuimi në Gazën veriore, që prek prek rreth 1.1 milion njerëz, ose të paktën të ndalojë fushatën e bombardimeve për të lejuar dërgesat e ndihmave nga Egjipti.
Ndërsa sulmet ajrore vijuan të shtunën dhe mijëra njerëz u larguan nga Gaza veriore, nuk kishte asnjë shenjë se këto përpjekje po jepnin ndonjë fryt. Në vend të kësaj, Izraeli rinovoi thirrjen e tij të shtunën për një evakuim masiv dhe la të kuptohet për shtrirjen e gjerë të planeve të tij pushtuese.
“Ata duhet të fillojnë të lëvizin,” u tha gazetarëve të shtunën një zëdhënës i Forcave të Mbrojtjes të Izraelit, nënkoloneli Richard Hecht, duke iu referuar palestinezëve. Ai nuk dha një afat kohor për evakuimin, një ditë pasi Izraeli kishte këmbëngulur se e gjithë popullsia prej gati 1.1 milionë banorësh në Gazën veriore – gjysma e popullsisë – duhet të shkonte në jug brenda 24 orëve.
“Ata kanë kohë për të lëvizur,” tha Hecht të shtunën.
Një procesion funerali u mbajt të shtunën në Liban për Issam Abdallah, një gazetar i Reuters që u vra të premten ndërsa punonte pranë kufirit jugor të Libanit të premten. Gjashtë gazetarë të tjerë u plagosën në atë që kolegët thanë se ishin bombardimet izraelite në zonën nga e cila po raportonin.
Vdekja e Abdallah ka ngjallur zemërim në Liban. Gazetarët e plagosur ishin nga Reuters, Agence France-Presse dhe Al Jazeera. Reuters raportoi, duke cituar një nga gazetarët e saj në vendngjarje, se ‘raketat e gjuajtura nga drejtimi i Izraelit i goditën ata’, duke përfshirë një që goditi Abdallah ndërsa ai ishte ulur në një mur të ulët guri, dhe një raketë tjetër që goditi një makinë që përdorej nga grupi.
Në përgjigje të pyetjeve në lidhje me bombardimet, Hecht, zëdhënësi i ushtrisë izraelite, tha të shtunën se ushtrisë izraelite i vjen shumë keq për vdekjen e gazetarit, por se nuk ishte i sigurt se kush ishte përgjegjës dhe do e hetonte ngjarjen.
Hanegbi, tha shefi i sigurisë kombëtare, pohoi se Izraeli nuk ishte i interesuar për një përshkallëzim përgjatë kufirit të tij verior me Libanin pasi ‘qëllimi ynë nuk është të tërhiqemi në një luftë me dy fronte’. Ai tha se besonte se ‘Hezbollahu nuk do ftonte në shkatërrimin e Libanit, gjë që nuk është ajo që ne duam, por ajo që do të ndodhte’.
Forcat e Mbrojtjes së Izraelit dhe Shin Bet, shërbimi i sigurisë së brendshme të Izraelit, thanë në një deklaratë të përbashkët se Ali Kachi, një komandant në forcën Nukhba, për të cilin ata thanë se udhëhoqi një nga grupet e sulmuesve që depërtuan në Izrael javën e kaluar, u vra në një sulm ajror. .
Kachi ishte një operativ i nivelit të mesëm të Hamasit. Ai ishte arrestuar më parë për rrëmbimin dhe vrasjen e izraelitëve, thuhet në deklaratë, përpara se të lirohej si një nga 1027 të burgosurit e Hamasit të shkëmbyer me ushtarin izraelit Gilad Shalit, i cili u kap në vitin 2006 dhe u mbajt nga grupi për pesë vjet.
Përkundër valës në rritje të dhunës, shtrirja tronditëse e krizës humanitare është shfaqur në shifrat e publikuara nga zyrtarët e ndihmës dhe kujdesit shëndetësor në Gaza. Ministria e Shëndetësisë atje tha të shtunën se 2,215 palestinezë, përfshirë 724 fëmijë, ishin vrarë që nga fillimi i fushatës ushtarake të Izraelit më 7 tetor. Gati 9,000 palestinezë ishin plagosur, tha ai.
Pothuajse 1 milion njerëz janë zhvendosur në Gaza gjatë javës së fundit, tha OKB, me qindra mijëra njerëz të zhvendosur vetëm në 12 orët e fundit. Më shumë se 2 milionë njerëz janë në rrezik pasi furnizimet me ujë mbarojnë, sipas Agjencisë së Ndihmës dhe Punëve të OKB-së, duke thënë: “Është bërë një çështje jete a vdekje”.
Zyrtarët e ndihmës janë lutur për uljen e tensioneve. António Guterres, Sekretari i Përgjithshëm i Kombeve të Bashkuara, ishte ndër ata që i bënë thirrje Izraelit të rishqyrtojë urdhrin e tij të evakuimit. Në një opinion të botuar në Neë York Times të premten, Guterres e përshkroi vendimin si ‘të rrezikshëm dhe thellësisht shqetësues’.
“Ne kemi nevojë urgjente për një rrugëdalje nga ky ngërç katastrofik përpara se të humbasin më shumë jetë,” vazhdoi Guterres, duke i bërë thirrje Hamasit të lirojë të gjithë pengjet izraelitë që mbante dhe duke u kërkuar të dyja palëve të respektojnë ligjin ndërkombëtar humanitar dhe të mbrojnë civilët.
Zyrtarët amerikanë thanë të shtunën se kishin negociuar një marrëveshje për të lejuar qytetarët amerikanë të largoheshin nga Gaza dhe të kalonin në Egjipt, gjatë një dritareje pesëorëshe gjatë pasdites. Por kalimi kufitar në Rafah mbeti i mbyllur gjatë gjithë dritares, pasi zyrtarët palestinezë dhe egjiptianë nuk arritën të komunikonin për hapjen e tij, tha një zyrtar atje, dhe deri në fund të ditës, askush nuk u lejua të kalonte.
Ka rreth 500 deri në 600 palestinezë amerikanë në Gaza. Disa janë ankuar ditët e fundit se administrata Biden po i kushtonte pak vëmendje gjendjes së tyre.
Wael Abu Omar, zëdhënësi palestinez për kalimin në Rafah, tha se zyrtarët palestinezë nuk kishin pasur asnjë komunikim me homologët e tyre në anën egjiptiane. Mediat egjiptiane raportuan se Kajro po këmbëngulte që dërgesat e ndihmave të dërgoheshin në Gaza si kusht për të lejuar të huajt të kalonin kufirin.
Dërgesat e ndihmave të destinuara për Gazën janë dërguar nga Turqia, Katari dhe vende të tjera të rajonit. Izraeli nuk kishte qenë i gatshëm të angazhohej për të mos goditur mjetet e ndihmës hyrëse, sipas një zyrtari diplomatik i cili foli në kushte anonimiteti, sepse zyrtari nuk ishte i autorizuar të diskutonte negociatat e ndjeshme. Diskutimet ishin në vazhdim për të krijuar një mekanizëm kontrolli që do t’i lejonte zyrtarët izraelitë të inspektonin mallrat në çdo automjet që hynte në Gaza, tha zyrtari.
Një tjetër diplomat i njohur me bisedimet mbi dërgesat e ndihmave tha se ata do të kërkonin që ‘Izraeli të ndalojë bombardimin e enklavës për disa orë’.
*Hendrix dhe Tarnopolsky raportuan nga Jeruzalemi, Hudson nga Riadi dhe Fahim nga Bejruti. Heidi Levine në Ashkelon, Izrael, Ellen Francis në Mynih, Karen DeYoung dhe Dan Rosenzweig-Ziff në Uashington dhe Victoria Bisset në Londër kontribuan në këtë raport.
VINI RE: Ky material është pronësi intelektuale e Washington Post
Përgatiti për Hashtag.al, Klodian Manjani
