Gjykata e lartë e Indisë refuzon të legalizojë martesat e të njëjtit seks
Gjykata e lartë e Indisë kundërshtoi të martën të ligjërojë martesat e të njëjtit seks dhe ia la parlamentit të vendosë, duke rënë dakord me qeverinë e kryeministrit Narendra Modi se legjislatura është forumi i duhur për të vendosur mbi çështjen e diskutueshme.
Urdhri i njëzëshëm i një trupi prej pesë gjyqtarësh iste një zhgënjim i madh për komunitetin e madh LGBTQ në vendin më të populluar në botë, pesë vjet pasi gjykata hoqi një ndalim të epokës koloniale për seksin homoseksual, shkruan Reuters.
Nuk pati asnjë përgjigje të menjëhershme nga qeveria ndaj vendimit të gjykatës, por administrata nacionaliste e Partisë Bharatiya Janata (BJP) e Modi kishte kundërshtuar peticionet drejtuar gjykatës për këtë çështje, duke thënë se martesa e të njëjtit seks nuk është ‘e krahasueshme me konceptin e njësisë familjare indiane të një burri, një gruaje dhe fëmijëve’.
Vendimi i gjykatës erdhi si përgjigje ndaj më shumë se një duzinë kërkesave të paraqitura që nga viti i kaluar. Trupi gjykues, i kryesuar nga kryetarja D.Y. Chandrachud, dëgjoi argumentet në prill dhe maj dhe shpalli vendimin të martën.
Chandrachud tha se kishte një shkallë ‘marrëveshjeje dhe një shkallë mosmarrëveshjeje se sa larg duhet të shkojmë’ për martesën e së njëjtës gjini, duke shtuar se katër nga pesë gjyqtarët kishin shkruar vendime të veçanta, duke pasqyruar kompleksitetin e çështjes.
“Kjo gjykatë nuk mund të bëjë ligje. Ajo vetëm mund ta interpretojë atë dhe t’i japë efekt,” tha Chandrachud, duke hedhur poshtë gjithashtu argumentin e qeverisë se të qenit homoseksual është ‘urban apo elitar’.
Gjykata ia la atë një paneli të sugjeruar nga qeveria për të trajtuar “shqetësimet njerëzore” të çifteve të së njëjtës gjini.
Ai tha se paneli duhet të përfshijë ekspertë me njohuri dhe përvojë në trajtimin e nevojave sociale, psikologjike dhe emocionale të njerëzve që i përkasin komunitetit gay.
Paneli duhet gjithashtu të marrë në konsideratë dhënien e qasjes të çifteve të së njëjtës gjini në shërbime dhe lehtësira të tilla si llogaritë e përbashkëta në banka dhe pensionet, nga të cilat ata janë aktualisht të ndaluar.
Anëtarët e komunitetit LGBTQ u panë të dilnin nga gjykata të përlotur pas vendimit, me disa që ngushëllonin njëri-tjetrin.
“Nuk kisha pritshmëri se do ishte një vendim shumë i mirë, por është shumë më i keq nga sa kishim menduar”, tha Uday Raj Anand, i cili së bashku me partnerin e tij të së njëjtës gjini, ishte në gjykatë.
Azia mbetet kryesisht prapa Perëndimit në pranimin e martesave të së njëjtës gjini me vetëm Tajvanin dhe Nepalin që e lejojnë atë në një kontinent ku vlerat kryesisht konservatore ende dominojnë shoqërinë.
