Luftëtarët e Hamasit ka të ngjarë që kanë përdorur armë të Koresë së Veriut gjatë sulmeve të tyre më 7 tetor ndaj Izraelit. Agjencia Associated Press tha se ky përfundim është nxjerr pas analizimit të një videoje dhe armëve që janë kapur nga Izraeli, pavarësisht se Pheniani ka mohuar se i shet armë këtij grupi militant palestinez.
Videoja është analizuar nga dy ekspertë për armët e Koresë së Veriut. Agjencia Associated Press ka analizuar armët e kapura në fushëbetejë, por është bazuar edhe në inteligjencën ushtarake të Koresë së Veriut, dhe sipas AP-së, videoja tregon se Hamasi ka përdorur raketahedhës krahu F-7, armë që zakonisht luftëtarët e përdorin kundër autoblindave.
Këto dëshmi hedhin dritë në dërgesat e paligjshme të armëve që Koreja e Veriut – shtet i goditur nga sanksionet ndërkombëtare – përdor në mënyrë që të financojë programet e saj të armëve.
Armët F-7 mund të mbushen me shpejtësi, që i bëjnë ato armë të vlefshme për forcat guerile. Granatahedhësi F-7 është dokumentuar se janë përdorur edhe në Siri, Irak, Liban dhe Rripin e Gazës tha N.R. Jenzen-Jones, ekspert i armëve që punon në Armament Research Services.
“Koreja e Veriut për një kohë të gjatë ka mbështetur grupet palestineze dhe armët verikoreane edhe në të kaluarën janë dokumentuar në mesin e dërgesave të ndaluara”, tha Jenzen-Jones për Associated Press.
Hamasi ka publikuar fotografi të trajnimeve ku shfaqen luftëtarët e tij me armë sikurse granatahedhës dhe elemente të tjera që përkojnë me F-7, tha Matt Schroeder, hulumtues në institutin Small Arms Survey, i cili ka shkruar një udhëzues për armët e lehta të Koresë së Veriut.
“Nuk është befasi që shohim armë të Koresë së Veriut te Hamasi”, tha Schroeder.
Arma verikoreane F-7 i ngjan granatahedhësit të epokës sovjetike RPG-7, por ka disa dallime.
Armët që janë kaluar nga ushtria izraelite u janë shfaqur gazetarëve. Në mesin e armëve ka edhe elemente të tjera që i përkasin granatahedhësve F-7.
Gjatë një takimi me gazetarë, Shtabi i Përgjithshëm i ushtrisë së Koresë së Jugut në mënyrë specifike ka identifikuar F-7 si një prej armëve të Veriut që besohet se Hamasi ka përdorur gjatë sulmeve ndaj Izraelit. Ushtria izraelite nuk i është përgjigjur AP-së lidhur me origjinën apo prodhuesin e këtyre granatahedhësve, duke argumentuar se lufta që po vazhdon ndaj Hamasit e parandalon të komentojë për këtë temë.
Koreja e Veriut, përmes agjencisë së lajmeve KCNA, javën e kaluar ka mohuar pretendimet se Hamasi ka përdorur armë të saj, duke i cilësuar këto pretendime si “të pabaza dhe të rreme” që sipas Phenianit janë të orkestruara nga Shtetet e Bashkuara.
Videot dhe fotografitë e propagandës së Hamasit, që janë publikuar në të kaluarën, kanë shfaqur militantët duke përdorur raketa kundërtanke Bulsae të Koresë së Veriut. Jenz-Jones tha se beson se bazuar në videot dhe fotografitë, militantët e Hamasit po ashtu kanë përdorur pushkë 58, të Koresë së Veriut, që është një variant për Kallashnikovin.
Irani po ashtu ka modeluar disa prej raketave të tij balistike bazuar në variantet që ka Koreja e Veriut.
Irani për një kohë të gjatë mbështet Hamasin dhe e ka përgëzuar pas sulmeve të 7 tetorit ndaj Izraelit.
VINI RE:Ky material është pronësi intelektuale e REL.
