Në një fjalim drejtuar kombit amerikan të enjten nga zyra ovale e Shtëpisë së Bardhë, presidenti i SHBA-së Joe Biden u bëri thirrje drejtpërdrejt amerikanëve që të mbështesin luftërat në Izrael dhe Ukrainë dhe njoftoi se do dërgonte një paketë ndihme në Kongres.
Vërejtjet vijnë një ditë pasi presidenti udhëtoi në Tel Aviv dhe ndërmjetësoi një marrëveshje ndihme për Gazën mes Egjiptit dhe Izraelit.
Ndihma humanitare është dëshpërimisht e nevojshme në Gaza, ku njerëzit e ngecur në enklavën e rrethuar po jetojnë në ‘kushte gjithnjë e më të rënda’, tha të enjten OCHA e OKB-së. E gjithë popullsia e Gazës është ndërprerë nga furnizimet me energji elektrike, ushqim, karburant dhe ujë për më shumë se një javë dhe shqetësimet po rriten për kushtet e përkeqësimit të shpejtë.
Çfarë ka ndodhur së fundmi
Kolapsi i kujdesit shëndetësor: Objekti kryesor mjekësor i Gazës, Spitali Al-Shifa në qytetin e Gazës, ka karburant të mjaftueshëm për të funksionuar gjeneratorët e tij për 24 orë, thanë të enjten Mjekët pa Kufij (MSF), duke paralajmëruar se pa energji elektrike shumë pacientë do vdesin.
Pacientët janë ‘në rrezik serioz të vdesin në orët e ardhshme, sepse po bëhet e pamundur të marrin kujdes mjekësor’, tha Guillemette Thomas, bashkërenduesja mjekësore e MSF për Palestinën, me qendër në Jerusalem.
Kalimi i Rafahut: Me ndërprerje të plotë të energjisë elektrike për të nëntën ditë radhazi, furnizimet me ushqim dhe ujë po pakësohen dhe spitalet në prag të kolapsit, vëmendja është në pikën kritike kufitare të Rafahut.
Megjithatë, vendkalimi Rafah nuk pritet të hapet të premten për një kolonë prej 20 kamionësh ndihmash për të hyrë në Gaza nga Egjipti, thanë burime të shumta për CNN. Zyrtarët amerikanë presin tani kolonën e parë këtë fundjavë.
Ndërkohë, autoritetet egjiptiane të enjten filluan heqjen e blloqeve të çimentos në hyrje të vendkalimit, duke u përgatitur për hapjen e tij, thanë disa shoferë atje për CNN.
Rritja e aktivitetit ushtarak: Ndërsa Izraeli përgatitet për një operacion të mundshëm tokësor, ministri i Mbrojtjes Yoav Gallant u tha trupave të mbledhura pranë kufirit të Gazës të enjten se ata ‘së shpejti do ta shohin enklavën nga brenda’, sipas një njoftimi për shtyp nga zyra e tij. Kur u pyet për koment mbi rritjen e veprimtarisë ushtarake në kufi, Zëdhënësi i Forcave të Mbrojtjes të Izraelit, nënKoloneli Jonathan Conricus tha: “Rezervat janë gati, të pajisura, të orientuara nga misioni dhe në pritje për fazën tjetër të operacioneve tona.”
Biden mbron Izraelin: Në fjalimin e tij nga Zyra Ovale, Presidenti i SHBA-së tha se do t’i dërgojë Kongresit një ‘kërkesë urgjente buxhetore’ të premten në mënyrë që ‘të financojë nevojat e sigurisë kombëtare të Amerikës për të mbështetur partnerët tanë të rëndësishëm, përfshirë Izraelin dhe Ukrainën’.
Biden akuzoi Hamas-in dhe Presidentin rus Vladimir Putin se duan të ‘asgjasojnë plotësisht demokracitë fqinje’, por vuri në dukje se ata ‘përfaqësojnë kërcënime të ndryshme’. Ai gjithashtu përsëriti mbështetjen për një zgjidhje me dy shtete, duke thënë se ‘Izraeli dhe palestinezët meritojnë njëlloj të jetojnë në siguri, dinjitet dhe paqe’.
Tensionet rajonale: Sekretari i Përgjithshëm i OKB-së António Guterres ka bërë një apel të menjëhershëm për një armëpushim humanitar. Një raund i ri protestash masive pritet të premten në të gjithë rajonin në mbështetje të palestinezëve që mbeten të bllokuar në enklavë.
Gjatë bisedimeve dypalëshe në Kajro të enjten, mbreti i Jordanisë Abdullah dhe Presidenti i Egjiptit Abdel Fattah El-Sisi ripohuan qëndrimin e tyre të përbashkët kundër politikave të ndëshkimit kolektiv në Gaza, duke përfshirë rrethimet, urinë dhe zhvendosjen. Udhëheqësit hodhën poshtë çdo përpjekje për zhvendosjen e detyruar të banorëve të Gazës në vendet e tyre përkatëse.
VINI RE: Ky material është pronësi intelektuale e CNN
