Tregu i punës në Rusi po kalon ndryshime drastike mes mungesës së fuqisë punëtore për shkak të një hendeku demografik dhe humbjeve nga pandemia, raportoi të martën Nezavisimaya Gazeta.
Sipas një sondazhi të kryer nga firma e konsulencës ‘Yakov and Partners’ (ish McKinsey), shumica e rusëve besojnë se trajnimi i vazhdueshëm, puna hibride dhe kërkesat në rritje do bëhen tendencat kryesore që do formësojnë tregun e punës në vend deri në vitin 2030.
Kërkesa e punonjësve u rrit me 160% verën e kaluar, krahasuar me të njëjtën periudhë të vitit të kaluar, sipas të dhënave nga agjencia e rekrutimit ‘Avito Job’.
Tre fushat kryesore që shënuan rritjen më të madhe të vendeve të lira të punës përfshinin menaxhimin e personelit, IT dhe administrimin, treguan të dhënat.
Dhe rritja më e madhe në ofertat e pagave u raportua në segmentet e arsimit, artit dhe shërbimeve. Studiuesit përmendën hendekun demografik si arsyen kryesore të mungesës së punëtorëve në Rusi, duke thënë se, çdo vit, tregut të punës i mungojnë mijëra specialistë të rinj.
“Për dhjetë vitet e fundit, çdo vit, në tregun e punës hyjnë rreth 100 mijë të rinj më pak, krahasuar me një vit më parë. Tregu i punës ka humbur rreth një milion njerëz për shkak të pandemisë Covid dhe dy milionë të tjerë për shkak të luftës në Ukrainë. Këtu përfshihen ushtarët me kontratë, ata që u mobilizuan dhe njerëzit që u larguan,” vuri në dukje studimi.
Kryeministri rus Mikhail Mishustin theksoi rëndësinë e programeve të përparuara të trajnimit në një takim kushtuar zhvillimit të arsimit në tregun e punës të martën.
“Shumë kompani tani kanë nevojë për punonjës kompetentë. Prandaj, është e nevojshme të krijohet një sistem fleksibël i rikualifikimit profesional në mënyrë që qytetarët të kenë aftësi shtesë dhe të kenë më shumë mundësi punësimi”, theksoi ai.
Ministria e Punës pret që, deri në vitin 2030, nevoja për punonjës do rritet më së shumti në fusha si prodhimi, transporti dhe logjistika, kujdesi shëndetësor dhe social, kërkimi dhe shkenca dhe IT.
