Kryeministri kanadez Justin Trudeau u prit keq gjatë një vizite të paparalajmëruar në një xhami në Toronto, ku u përball me një turmë, lidhur me qasjen e tij ndaj konfliktit Hamas-Izrael. Trudeau ka shprehur mbështetje për Izraelin, ndërsa nuk ka bërë thirrje për një armëpushim.
Të premten, kryeministri shkoi në një xhami në zonën Etobicoke. Zyra e tij tha gjithashtu se ai vizitoi Organizatën Ndërkombëtare të Myslimanëve të Torontos ‘për të treguar mbështetjen e tij për ata që janë prekur në komunitetin mysliman nga ngjarjet e tmerrshme në Lindjen e Mesme’.
Megjithatë, Trudeau u prit ftohtë. Një video virale në mediat sociale tregon Trudeau duke qëndruar pranë podiumit ndërsa prezantohej, me disa njerëz që bërtisnin: “Turp!”
Një pjesë tjetër e videos tregon Trudeau duke u tallur teksa del nga një ndërtesë i shoqëruar nga policia. Një aktiviste mund të dëgjohet duke thënë: “Sa fëmijë palestinezë duhet të masakrohen përpara se të bëni thirrje për armëpushim?”
Të premten, më shumë se 30 deputetë kanadezë, kryesisht anëtarë të Partisë së tij Liberale, i shkruajtën një letër Trudeau duke i kërkuar atij që t’i bënte thirrje Izraelit dhe Hamasit për armëpushim.
“Sa më gjatë të vazhdojë kjo përplasje, aq më shumë civilë të pafajshëm do paguajnë me jetë. Ne kërkojmë që Kanadaja t’i bashkohet thirrjes ndërkombëtare në rritje për një armëpushim të menjëhershëm,” thanë ata.
Menjëherë pas shpërthimit të konfliktit më 7 tetor, Trudeau lëshoi një deklaratë duke dënuar sulmin e Hamasit ndaj Izraelit ‘në termat më të fortë të mundshëm’, ndërsa theksoi se Otava mbështet të drejtën e vendit për t’u mbrojtur.
Ndërsa disa liberalë mbrojnë një armëpushim, shumë nga anëtarët e tjerë të partisë së tyre këmbëngulin se Hamasi duhet të mposhtet.
