Kryeministri izraelit Benjamin Netanyahu tha të mërkurën se Izraeli po përgatitet për një inkursion tokësor në Rripin e Gazës, por tha se ai ‘nuk do e specifikojë’ se kur dhe si do ndodhte ai. Publiku nuk ishte në dijeni të shumë hollësive, tha ai, ‘dhe kështu supozohet të jetë’.
Në një telefonatë me Netanyahun të mërkurën pasdite, Presidenti Biden vuri në dukje rëndësinë e ‘një shtegu për një paqe të përhershme midis izraelitëve dhe palestinezëve’ pas krizës, ndërsa përsëriti mbështetjen e tij për të drejtën e Izraelit për t’u mbrojtur, sipas Shtëpisë së Bardhë.
UNRWA, një agjenci humanitare e OKB-së në Gaza, tha se ‘filloi të zvogëlojë ndjeshëm operacionet e saj’ për shkak të mungesës së karburantit për gjeneratorët, të cilët Izraeli i ka bllokuar të hyjnë në enklavë për më shumë se dy javë.
Pikat kyçe deri tani
- Sulmet izraelite kanë vrarë të paktën 6,547 njerëz në Gaza dhe kanë plagosur më shumë se 17,400, tha Ministria e Shëndetësisë në Gaza. Autoritetet izraelite thanë se më shumë se 1,400 njerëz janë vrarë në Izrael dhe më shumë se 5,400 janë plagosur që nga sulmi i Hamas-it më 7 tetor. Të paktën 32 shtetas amerikanë janë në mesin e të vrarëve.
- Dhoma e Përfaqësuesve e SHBA-së miratoi të mërkurën një rezolutë për të qëndruar në krah të Izraelit në veprimin e tij të parë nën kryesuesin e ri, Kongresmenin republikan Mike Johnson, i cili e siguroi postin vetëm disa orë më parë.
- Këshilli i Sigurimit i OKB-së dështoi përsëri të miratonte një qëndrim të unifikuar për luftën. Shtetet e Bashkuara dhe Britania vendosën veton ndaj një rezolute ruse për të kërkuar një armëpushim të plotë dhe Rusia, Kina dhe Emiratet e Bashkuara Arabe vendosën veton ndaj një rezolute të SHBA-së që bën thirrje për një pauzë humanitare për të lejuar ndihmën.
