Shefi i Tesla-s, Elon Musk, njoftoi të shtunën se sistemi i tij i komunikimit me bazë satelitore Starlink do të zgjerojë shërbimet e tij për “organizatat e njohura ndërkombëtare të ndihmës” në Rripin e Gazës pasi Izraeli ndërpreu rrjetet e komunikimit duke shkaktuar një ndërprerje të plotë në enklavën e rrethuar të premten mbrëma, sipas AA.
Elon Musk tha në X: “Starlink do të mbështesë lidhjen me organizatat e njohura ndërkombëtare të ndihmës në Gaza”.
Disa orë më vonë, Musk tha përsëri në X: “Ne do të mbështesim OKB-në dhe grupet e tjera të njohura ndërkombëtarisht të ndihmës”.
Më herët, Musk u angazhua në një bisedë me aktivistë dhe zyrtarë në platformën X teksa ata ngritën shqetësimet e tyre për ndërprerjen e të gjitha rrjeteve të internetit dhe telekomunikacionit në Rripin e Gazës dhe pasojat që ajo ka, veçanërisht në operacionet e OKB-së dhe shërbimet e kujdesit shëndetësor.
Ndërsa Izraeli po përgatitej për një operacion të gjerë tokësor në Gaza, Ministria izraelite e Komunikimeve tha se filloi bisedimet zyrtare me kompaninë e Musk, SpaceX, për të ofruar shërbime Starlink si rezervë në rast se sistemet e tjera dështojnë në Izrael.
Ministria izraelite deklaroi se ky hap do të sigurojë që qytetet e vendosura në vijën e parë të enklavës së Gazës dhe zonave të zonës së luftës të marrin shërbime të vazhdueshme interneti.
