Disa dhjetëra dronë ukrainas janë pikasur dhe shkatërruar mbi Detin e Zi dhe pjesën veriperëndimore të Gadishullit të Krimesë, tha ushtria ruse të dielën herët në mëngjes.
Mbrojtja ajrore ruse ka parandaluar një tjetër “përpjekje për sulm terrorist nga regjimi i Kievit” me 36 dronë të tipit aeroplan të kapur gjatë rrugës për në Krime, tha ushtria në një deklaratë të shkurtër pak para orës 2 të mëngjesit me orën vendase, pa dhënë hollësi të mëtejshme.
Nuk ka raportime për dëme apo viktima në terren, dhe zyrtarët lokalë ende nuk kanë komentuar mbi incidentin.
Kievi ka shtuar sulmet me raketa dhe drone në Krime gjatë muajve të fundit. Më 13 shtator, Ukraina goditi një kantier detar në Sevastopol me raketa lundrimi, duke dëmtuar dy anije detare, sipas ushtrisë ruse. Nëntë ditë më vonë, një raketë goditi selinë e Flotës së Detit të Zi në Sevastopol.
Ukraina ka përdorur gjithashtu drone detare për të sulmuar infrastrukturën portuale ruse në Sevastopol në shumë raste. Dronët detarë kanë shënjestruar infrastrukturën kryesore të transportit si Ura e Krimesë, e cila u dëmtua rëndë në një sulm në korrik, por u riparua dhe u rihap plotësisht në fillim të këtij muaji.
