Sam Bankman-Fried, i cili dikur drejtonte një nga shkëmbimet më të mëdha të kriptomonedhave në botë, është shpallur fajtor për mashtrim dhe pastrim parash pas një gjyqi njëmujor në Nju Jork.
Juria dha vendimin e saj pas më pak se pesë orësh diskutimesh. Bankman-Fried u arrestua vitin e kaluar pasi firma e tij, FTX, falimentoi, ndërsa tani ai pritet të përballet me dekada burg. Dënimi i tij është caktuar për 28 mars të vitit të ardhshëm.
“Sam Bankman-Fried kreu një nga mashtrimet më të mëdha financiare në historinë amerikane – një skemë shumë miliarda dollarëshe e krijuar për ta bërë atë mbret të kriptove. Ky rast ka qenë gjithmonë për gënjeshtra, mashtrime dhe vjedhje dhe ne nuk kemi durim për këtë”, tha avokati amerikan Damian Williams në një deklaratë pas vendimit.
Prokurorët akuzojnë Bankman-Fried se kishte gënjyer investitorët dhe huadhënësit dhe se kishte vjedhur miliarda dollarë nga shkëmbimi i kriptomonedhave FTX, duke ndihmuar në përshpejtimin e kolapsit të saj. Ata e akuzuan atë për shtatë akuza, për mashtrim të klientëve dhe pastrim parash, raporton BBC.
Pas vendimit, avokati i Bankman-Fried, Mark Cohen tha: “Ne e respektojmë vendimin e jurisë, por jemi shumë të zhgënjyer me rezultatin. Z. Bankman-Fried pohon pafajësinë e tij dhe do të vazhdojë të luftojë fuqishëm akuzat kundër tij”.
Tre nga ish-miqtë dhe kolegët e tij të ngushtë, përfshirë ish të dashurën e tij Caroline Ellison, u deklaruan fajtor dhe ranë dakord të dëshmonin kundër tij me shpresën për të ulur dënimet e tyre.
Prokuroria paraqiti prova se firma e tregtimit të kriptove të Bankman-Fried Alameda Research mori depozita në emër të klientëve të FTX që në ditët e para të shkëmbimit. Në vend që t’i ruante ato fonde, siç Bankman-Fried u zotua vazhdimisht të bënte publikisht, ai i përdori paratë për të shlyer huadhënësit Alameda, për të blerë prona dhe për të bërë investime dhe donacione politike.
Për pesë nga akuzat, Bankman-Fried u shpall fajtor pritet të dënohet me 20 vjet për secilën akuzë, ndërsa për dy akuzat e tjera me një maksimum prej pesë vitesh. Kjo krijon një dënim të mundshëm prej 110 vjetësh, dhe megjithëse nuk ka gjasa që gjyqtari ta vendosë këtë, Bankman-Fried pritet të përballet me një dënim që zgjat dekada.
