Një korrespondent i televizionit Palestinez dhe 11 anëtarë të familjes së tij u vranë të enjten në Gazën jugore, sipas rrjetit televiziv të drejtuar nga Autoriteti Palestinez, në atë që e përshkroi si një sulm ajror izraelit, shkruan CNN.
Mohammad Abu Hattab kishte raportuar drejtpërdrejt në transmetim të enjten mbrëma jashtë spitalit Nasser në Gaza. Tridhjetë minuta më vonë, pasi ishte kthyer në shtëpi, korrespondenti u vra, raportoi rrjeti i tij. Agjencia e lajmeve WAFA raportoi gjithashtu vdekjen e tij dhe të familjes së tij.
Ushtria izraelite nuk kishte asnjë koment të menjëhershëm mbi incidentin dhe CNN nuk mundi të konfirmonte në mënyrë të pavarur burimin e shpërthimit në shtëpi. Televizioni Palestinez nuk ka publikuar prova që e lidhin atë drejtpërdrejt me një sulm izraelit, shkruan media amerikane.
Vdekja e Hattab shkaktoi valë tronditjeje në redaksinë e tij, me gazetarin e TV Palestinez, Salman Al Bashir, që tha se nuk kanë asnjë mbrojtje.
“Nuk mund ta durojmë më këtë. Jemi të rraskapitur, jemi këtu viktima dhe dëshmorë që presim vdekjen tonë, po vdesim njëri pas tjetrit dhe askush nuk kujdeset për ne apo për këtë katastrofën në shkallë të gjerë në Gaza. Asnjë mbrojtje, asnjë mbrojtje ndërkombëtare fare, asnjë imunitet ndaj asgjëje, kjo pajisje mbrojtëse nuk na mbron,” vijoi Al Bashir, ndërsa hoqi helmetën dhe jelekun e tij mbrojtës, në të cilin ishte shkruar “PRESS” me gërma të ndritshme.
