Majtas ish-zv.presideti Mike Pence, në mes ish=presidenti Trump, djathtas biznesmeni Peter Thiel
Një vit më parë, miliarderi i Silicon Valley, Peter Thiel, mori një shytje nga një bashkëpunëtore e tij prej shumë kohësh, ekspertja e krahut të djathtë Ann Coulter, që e nxiste atë të mbështeste guvernatorin e Floridës, Ron DeSantis, një pretendent për nominimin presidencial republikan.
Thiel shtangu. Coulter ishte një nga shumë njerëz që i kërkonin sundimtarit të dikurshëm politik – i cili mbështeti Donald Trump në zgjedhjet e vitit 2016 dhe financoi një listë të konkurrentëve të linjës së Trump në zgjedhjet afatmesme të 2022 – të mbështeste një kandidat në garën e 2024, sipas tre personave të njohur me bisedat private i cili foli në kushte anonimiteti.
Fushata e presionit vijoi këtë prill, kur vetë Trump e thirri për t’i kërkuar Thiel mbështetjen. Në një bisedë telefonike të diskutueshme, manjati i teknologjisë nuk pranoi.
Vetëm dy muaj përpara fillimit të sezonit primar republikan në Ioëa, Thiel është një nga disa konservatorët e fuqishëm të Silicon Valley që rivlerësojnë pjesëmarrjen e tyre në politikë. Pesha të rënda të teknologjisë që ndihmuan në nisjen e kandidaturës së Trump, u kanë thënë bashkëpunëtorëve të ngushtë se ndihen të tjetërsuar nga republikanët dhe po kërkojnë një kandidat që përputhet më ngushtë me axhendën e tyre ekstreme pro-biznesit.
Kapitalisti sipërmarrës i krahut të djathtë David Sacks ishte një mbështetës i madh i DeSantis dhe mori pjesënë çeljen e fushatës presidenciale të DeSantis në X, në pranverë. Por muajt e fundit, Sacks është acaruar me DeSantis-in, sipas dy njerëzve të njohur me çështjen dhe ka mbledhur fonde për rivalët Vivek Ramaswamy dhe Robert F. Kennedy Jr, të cilët po kandidojnë për demokratët. (Kennedy më pas ka nisur një fushatë si i pavarur.)
Të tjerët, si Thiel, janë aq të zhgënjyer nga tendenca e diskursit të republikanëve sa duket se kanë vendosur të heqin dorë tërësisht nga fushata e 2024-ës.
Ambivalenca midis liderëve të teknologjisë shkon përtej mosmbështetjet për ish-presidentin, i cili u përbuz nga disa mbështetës të profilit të lartë të botës së teknologjisë pas sulmit të 6 janarit 2021 në Kapitolin e SHBA-së.
Edhe pse elita e teknologjisë shpesh e ka kritikuar të majtën dhe agjendën “woke”, disa tani thonë se republikanët kanë mbitheksuar çështjet shoqërore përçarëse, si të drejtat e transgjinorëve dhe abortin në kurriz të qëllimit kryesor politik të titanëve të teknologjisë: derregullimin radikal.
Dikur të joshur nga perspektiva se Trump do sillte një epokë të re, ultra-kapitaliste në politikën republikane, anëtarët e elitës së teknologjisë me prirje të djathtë tani po kërkojnë aleatë për të mbrojtur industrinë nga sulmet nga të dyja palët dhe për të mbrojtur vlerën e saj si motori ekonomik më dinamik i vendit.
Këto pikëpamje janë kalcifikuar nga përpjekjet e qeverisë për të rregulluar inteligjencën artificiale, të cilën figurat e Silicon Valley e shohin si një teknologji shndërruese që do vuante nga ndërhyrja e qeverisë.
Ky zhgënjim pasqyron ndjenjën që kazënë vend mes donatorëve republikanë në gjithë vendin. Ata janë shfryrë nga perspektiva e një presidence tjetër Trump, duke përmendur sjelljen e çrregullt të presidentit dhe ndërlikimet e tij të shumta ligjore.
Por ambivalenca e donatorëve të krahut të djathtë të Silicon Valley, së bashku me një mori humbjesh të republikanëve në zgjedhjet e së martës, thellon pakënaqësinë për nominimin e plotë të Trump.
“Ka një shkëputje shumë të madhe tani midis anëtarëve të grupit parlamentar dhe votuesve kryesorë dhe njerëzve që lëshojnë çeqet e majme për republikanët,” tha një këshilltar politik i donatorëve kryesorë të Silicon Valley në të djathtë.
“Ne nuk na intereson shkuarja ose jo e fëmijëve transgjinorë në banja të ndara. Ne na intereson çmontimi i shtetit rregullator.”
Besimi në aftësinë e Trump për të pakësuar mbikëqyrjen e qeverisë mbi biznesin është shkatërruar, duke i lënë konservatorët në industrinë e teknologjisë në mëshirë të fatit, sipas dhjetëra njerëzve që janë ose këshilltarë të ngushtë ose miq të donatorëve të mëdhenj të teknologjisë. Shumica folën në kushte anonimiteti.
Ann Coulter nuk pranoi të komentonte. Fushata e Trump nuk iu përgjigj një kërkese për koment.
Nga inxhinierët e rangut të lartë deri te kapitalistët tepër të pasur, industria e teknologjisë ka kohë që ka anuar në anën liberale. Gjatë viteve të Obamës, demokratët dhe republikanët e panë sektorin e teknologjisë si një pikë të ndritshme në një ekonomi të dëmtuar nga recesioni dhe të dhënat e këqija në Wall Street. Figura të njohura të Silicon Valley, si ish-kreu i Google, Eric Schmidt, kultivuan lidhje të thella me administratën Obama.
Pastaj Trump kandidoi për president, duke emocionuar një grup të vogël por me ndikim. Thiel dhuroi 1.25 milionë dollarë për fushatën e parë të Trump, duke deklaruar në një fjalim në kongresin e republikanëve të vitit 2016 se ai ishte krenar që ishte edhe republikan edhe homoseksual.
Kapitalisti i sipërmarrjes Doug Leone – pasuria neto e të cilit është raportuar 6.8 miliardë dollarë falë investimeve të hershme në Apple, PayPal, Google dhe WhatsApp – dhuroi më shumë se 200,000 dollarë për komitetet e Trump-it dhe shoqatave të lidhura me të deri në vitin 2019 dhe më pas ishte pjesë e ekipit për rimëkëmbjen ekonomike të pandemisë.
Sipas të dhënave publike, bashkëthemeluesi i Sun Microsystems, Scott McNealy dhe gruaja e tij, Susan, i kanë dhënë më shumë se 500 mijë dollarë Trump-it, duke filluar me kandidimin e tij presidencial në vitin 2016. Ata e mbështetën kandidaturën e tij për rizgjedhje duke organizuar një mbledhje fondesh prej 100,000 dollarësh për kokë në shtëpinë e tyre në Silicon Valley.
Bashkëthemeluesi dhe kryetari ekzekutiv i Oracle, Larry Ellison, i dha hua Trump-it pronën e tij në Kaliforninë Jugore për një mbledhje fondesh përpara zgjedhjeve paraprake të vitit 2020, duke nisur përfundimisht një partneritet publik-privat me Shtëpinë e Bardhë për të luftuar koronavirusin.
Menjëherë pasi Trump humbi ndaj Joe Biden, Ellison iu bashkua këshilltarëve të Trump në një thirrje të diskutueshme për të hartuar strategji për të kundërshtuar rezultatet e zgjedhjeve presidenciale të vitit 2020.
Njerëzit që e njohin Leone-n, republikan prej një kohe të gjatë, thanë se mbështetja e tij për Trump ishte e lidhur me besimin se ish-biznesmeni i Nju Jorkut do shkurtonte burokracinë dhe do sulmonte industritë e rrënjosura që bllokonin hyrjet nga Silicon Valley.
Udhëheqësit e Silicon Valley në të djathtë, përfshirë Ellison, i panë vitet e Obamës si katastrofike politikisht dhe Trump përfaqësoi një largim të mirëpritur. Thiel, në veçanti, e shihte Trumpin si një president krejt të kundërt me Obaman.
Dhëndri i Trump, Jared Kushner dhe vëllai i Kushner-it, Josh, një demokrat, janë investitorë dhe sipërmarrës me një rrjet të fortë në Silicon Valley, duke përfshirë lidhjet me Fondin e Themeluesve të Thiel dhe Sequoia të Leone-s.
Por mbështetësit në Silicon Valley të Trump-it kanë qenë kryesisht të zhgënjyer.
“Problemi ishte se Trump ishte shumë i padisiplinuar dhe tiparet e karakterit të tij sabotuan ndryshimet e politikave,” tha Keith Rabois, një partner i përgjithshëm në firmën sipërmarrëse të Thiel Founders Fund dhe një donator i republikanëve që nuk e mbështeti kurrë Trump-in.
“Në vend që të merrte vendime ekzekutive pa pushim, ai shkaktoi trazira dhe kaos dhe kjo do ndërhynte në axhendën e tij.”
Sot, Ellison është një nga donatorët më të mëdhenj të një grupi që mbështet Senatorin Tim Scott, një kandidat presidencial republikan. Leone dhuroi 2 milionë dollarë në fillim të këtij viti për organizatën që mbështeste kandidaturën e DeSantis.
Dhe donacioni i vetëm i McNealy këtë vit ka qenë një dhuratë prej 6,600 dollarësh për guvernatorin e Dakotës së Veriut, Doug Burgum, një shok klase dikur në Stanford i cili ka bërë një fushatë të gjatë për nominimin republikan.
Thiel ka thënë se ai do largohet tërësisht nga zgjedhjet e 2024-ës. Tre njerëz të njohur me çështjen thanë se vendimi i tij u nxit nga mungesa e një kandidati që pasqyronte pikëpamjet e tij dhe gërryerja e privatësisë së tij që ka shoqëruar përfshirjen e tij shumë të dukshme në politikën presidenciale.
Por presioni nga miqtë e miliarderit dhe bashkëshorti i tij – mes tjetërsimit të tij nga një parti që po anon shumë në luftime kulturore përçarëse – e shtyu atë të largohej nga republikanët.
Thiel vijoi të mbështesë kandidatin republikan të Senatit Blake Masters në vitin 2022, edhe pse Masters ishte kundër legalizimit të martesës së të njëjtit seks, pavarësisht se mori pjesë në dasmën e Thiel me një burrë.
Por rrethi i ngushtë i miqve homoseksualë të Thiel-it e kritikoi atë për mbështetjen e Masters dhe se mbeti një donator kryesor i republikanëve në një kohë kur partia po merrte gjithnjë e më shumë qëndrime anti-LGBTQ+.
Ellison dhe Leone u larguan nga Trump pas zgjedhjeve të vitit 2020. Ndërsa Leone hoqi dorë nga Trump publikisht pas sulmit të 6 janarit, Ellison e ndërpreu marrëdhënien e tij me Trump pas telefonatës për strategjitë zgjedhore, tha një nga njerëzit e njohur me të.
“Le ta themi kështu: Kjo ishte pjesëmarrja e fundit me fushatën e Trump që ai bëri”, tha personi, i cili vuri në dukje se Ellison mori pjesë në telefonatë thjesht për mirësjellje.
Thiel dhe Leone nuk pranuan të komentojnë. Ellison dhe McNealy nuk iu përgjigjën kërkesave për koment.
Edhe republikanët në Silicon Valley që i rezistuan Trump-it po përpiqen të arrijnë aleatët e duhur në Uashington. Sacks, i cili ka dhuruar për DeSantis, kaloi javë duke punuar me ish-ekzekutivin e PayPal, Elon Musk për të siguruar një transmetim të drejtpërdrejtë për të nisur fushatën e DeSantis në X, në atë kohë të njohur si Twitter.
Por njerëzit e njohur me rastin e Sacks thonë se ai është bërë gjithnjë e më i zhgënjyer me DeSantis, i cili po paraqitet keq në sondazhet kombëtare.
Kur Sacks dhe investitori Joe Lonsdale, një i mbrojtur prej shumë vitesh i Thiel, organizuan një mbledhje fondesh në Kaliforni për DeSantis në shtator, Lonsdale nuk u shfaq. Sacks organizoi një mbledhje fondesh prej 50,000 dollarësh për Ramaswamy të nesërmen.
Një person i njohur me Sacks tha se mbledhja e fondeve për DeSantis ishte planifikuar prej kohësh, por se ajo për Ramaswamy iu shtua kalendarit në minutën e fundit – një shenjë e interesit në rritje të Sacks për axhendën liridashëse dhe të gjithanshme të Ramaswamy-t.
Sacks dhe mbështetës të tjerë toleruan disa nga pozicionet më polarizuese të DeSantis, të tilla si grindjet e tij me Disney-n për çështjet transgjinore dhe ndalimin e tij gjashtëjavor të abortit.
Disa nga ato beteja përputheshin me axhendat e liderëve të Silicon Valley: Ashtu si DeSantis, Sacks përdorte shpesh Twitter-in për të kritikuar mediat kryesore dhe të majtën “woke”. Thiel, i cili gjithashtu ka kritikuar agjendën “woke”, vlerësoi DeSantis në një fjalim vitin e kaluar si një model për republikanët.
Por donatorët e Silicon Valley, duke përfshirë Sacks dhe Thiel, filluan të ndjenin se grindjet e DeSantis po bëheshin një shpërqendrim dhe se ai kurrë nuk kaloi në një fushë më të gjerë presidenciale teksa po rrëshqiste në sondazhe.
“Shumica e njerëzve të Silicon Valley janë politikisht, por jo socialisht konservatorë,” tha një nga njerëzit e afërt Sacks.
“Gjithçka që duhej të bënte DeSantis ishte të qenit e të shfaqurit normal. Tani ai është fiksuar keqazi me këtë gjënë “ëoke”.”
Rabois, i cili tha se kohët e fundit e ka zhvendosur mbështetjen e tij për ish-guvernatoren e Karolinës së Jugut, Nikki Haley, tha se ai ende beson se DeSantis ishte një guvernator i shkëlqyer me guxim të jashtëzakonshëm për t’iu kundërvënë mediave tradicionale dhe Disney-t.
Por me botën “në greminën e një tjetër lufte të rëndë botërore”, tha ai, DeSantis nuk ka treguat ekspertizë të sofistikuar në politikën e jashtme dhe ekonomi.
Ndërkohë, Ellison mund të jetë duke tërhequr njëfarë mbështetjeje nga Scott. Miliarderi pritej të jepte një kontribut thelbësor në organizatën që mbështeste ofertën presidenciale të Scott në fillim të këtij viti, sipas dy njerëzve të njohur me strategjinë e grupit.
Por paratë duket se nuk kanë ardhur, duke shkaktuar shqetësim me fushatën, e cila anuloi 40 milionë dollarë në rezervimet e reklamave që ishin planifikuar të fillonin në shtator.
Miqtë dhe këshilltarët e donatorëve të Silicon Valley thonë se tjetërsimi themelor nga politika rrjedh nga ajo që njerëzit e perceptojnë si dështim i Uashingtonit për t’i shërbyer industrisë së teknologjisë – një ndjenjë që është përshpejtuar vetëm gjatë viteve të Trump dhe Biden.
Trump kishte një aghendë të promovimit të derregullimit. Në muajin e tij të parë në detyrë, ai lëshoi një urdhër ekzekutiv duke thënë se për çdo rregullore të re të krijuar, dy duhet të shkurtohen. Por për katër vitet e ardhshme, Shtëpia e Bardhë e Trump u përfshi në kaos dhe njerëzit në Silicon Valley e kuptuan se rrugët për start up-et nuk u materializuan.
“Shikoni agjencitë kryesore. FTC, FDA. A kishin më pak kur Trump la detyrën sesa kur filloi? Përgjigjja është jo,” tha një nga këshilltarët e donatorëve kryesorë të Silicon Valley.
Trump gjithashtu iu bashkua një kori politikanësh që sulmonin industrinë e teknologjisë se po bëhej shumë e fuqishme. Ai u përpoq të largonte TikTok-un nga pronari i tij kinez, ByteDance, një goditje e madhe për një kompani të mediave sociale që kishte marrë fonde të konsiderueshme nga Sequoia Capital i Leone-s.
Administrata Trump përfundimisht e emëroi Oracle-n e Ellison-it partnerin teknologjik të SHBA-së për TikTok-un, një vendim që disa kritikë thanë se dukej si një shpërblim për mbështetjen politike të Ellison.
Ndërsa disa liderë të teknologjisë, si Thiel, mbështetën sulmet e Trump dhe republikanëve ndaj Big Tech, sot elita e teknologjisë në të gjithë spektrin politik ka frikë se Uashingtoni është bërë tepër ndërhyrës në industri të tilla si kriptomonedhat dhe inteligjenca artificiale.
“Disa njerëz këtu e mbështetën Trump-in dhe ai u kthye kundër Big Tech. Tani teknologjia është gogoli për të dyja palët,” tha një tjetër nga këshilltarët e donatorëve me ndikim të Silicon Valley.
Jeff Giesea, një mik i vjetër i Thiel-it, i cili po nis një institut jopartiak të quajtur Instituti Boyd, tha se aleanca midis titanëve të Silicon Valley dhe republikanëve të Trump është një aleancë e vështirë. Megjithëse donatorët janë prirur në sulme polarizuese ndaj medias dhe të majtës, ai tha se ata e shohin veten si të bllokuar në një parti që nuk është e interesuar të punojë në mënyrë strategjike.
“Tani për tani, republikanët janë i gjithi një karrem,” tha Giesa.
“Në një nivel, këta djem janë anti woke. Por ka nisur një rizgjim se mund agjenda anti-woke mund të të ngecet në fyt – se është një shpërqendrim nga zgjidhja e problemeve të vërteta.”
VINI RE: Ky material është pronësi intelektuale e Washington Post
Përgatiti për Hashtag.al, Klodian Manjani
